Elizalde Eskolan, lanak
Foru Aldundiaren diru laguntza eskuratu dute eskolan natura guneak sortzeko. Fatxada eta teilatua ere berrituko dituzte.
Elizalde Eskolak Gipuzkoako Foru Aldundiaren laguntza lortu du eskolako patioan zein barrualdean natura guneak sortzeko. Arnasguneak du izena proiektuak, eta “albiste pozgarria” helarazi nahi izan diote komunitateari.
Ohar berean jakinarazi dute Hezkuntza Sailak eta Oiartzungo Udalak akordio estrategiko bat adostu dutela eskolako fatxada eta teilatua berritzeko “ikuspegi energetiko eta klimatiko batetik”. Bide horretan, honakoa zehaztu dute: “Oso pozgarria da ikustea instituzioen arteko lankidetza harremanak sortu eta loratzen ari direla hezkuntza publikoaren alde”.
Elizaldek aldundiak ematen dituen diru laguntzetara aurkeztu zuen Arnasguneak proiektua, eta eskatutako 23.726,85 euroko aurrekontutik 17.584,51 euroko ekarpena egingo du aldundiak. Gainontzeko zatia, berriz, Oiartzungo Udalak hartuko du bere gain.
‘Arnasguneak’, Transpatioaren osagarri
Aipatutako proiektu hori 2017an martxan jarri zuten Transpatioa egitasmoaren jarraipena da, eta haren helburua da “eskolan bertan ingurune naturalizatu eta inklusiboak sortzea, ikasleen ongizatea, esperimentazioa eta zaintza sustatzeko”.
Azaldu dutenez, zuhaitz berriak landatzea izango da egingo duten berrikuntzetako bat, baina ez bakarra; izan ere, gehitu dute hamaka finko zein mugikorrak eta enbor hilak jarriko dituztela, eta oasiak ere sortuko dituztela. Hots, erabilera desberdineko eremuak bereiziko dituzte. Lan horiek urtarriletik urrira bitartean egingo dituzte.
Azkenik, kanpoaldeko lanez gain, Elizaldetik jakinarazi dute eskolako barnealdea ere eraldaketa prozesu batean dagoela murgilduta, eta beraz, Hezkuntza Saileko Gipuzkoako lurralde ordezkaritzako teknikariekin bilera bat egingo dutela eraikinaren zenbait zatitan “kanpoko eta barneko eraldaketak modu bateratuan eta koherentean burutzeko”.
