Eros daitezke bazkari begano feministako txartelak
Oiartzungo Feministen Asanbladak Xanistebanetako egitarau feminista argitaratu du. Agerraldi feminista eta bazkari feminista izango dira, besteak beste, aurtengoan.
Oiartzungo Feministen Asanbladak aurtengo Xanistebanetako egitarau feminista argitaratu du sareetan. “Jaiak kolorez margotu eta askatasunez gozatzeko egitarau feminista” ondu dute, eta bi egunetarako antolatu dituzte jarduerak.
Azaldu dutenez, asanblada feminista txosna gunean izango da, eta “espazio hori ere guztiontzat erosoa izan dadin lanean ibili gara”.
Hori horrela, agerraldi feminista, bazkari begano feminista, bingo musikatua eta Boloma izango dira aurtengo Xanistebanetako egitaraua osatzen duten jarduerak, eta jakinarazi dutenez, udalarekin elkarlanean prestatutako arreta gune bat egongo da erasoentzat.
Bazkariko txartelak, salgai
Abuztuaren 4an izango da bazkari begano feminista, Zimitiyoko txosnan, eta dagoeneko txartelak salgai jarri dituzte Kastro tabernan.
Tiket arruntak 15 euro balio ditu, eta haurrenak zein langabetuenak, berriz, 12 euro. Menu bereziren bat behar duenak edota alergiaren bat duenak asanblada feministako kideei jakinarazi behar die aldez aurretik.
Egitarau feminista
- Abuztuak 2, igandea
- 17:30. Agerraldi feminista herriko plazan.
- Abuztuak 4, asteartea
- 14:30. Bazkari begano feminista Zimitiyoko txosnan.
- 17:00. Bingo musikatua Zimitiyoko txosnan.
- 19:00. Boloma txosnagunean.
