Hasi dira karmenak!
Atzo hasi ziren 2026ko Karmengo Amaren Jaiak. Igandera arte izango dira indarrean Pasaiako laugarren festak.
Atzoko txupinazokoa da ondoko irudia. Atzo arratsaldean hasi ziren Pasaiako udako laugarren festak, Trintxerpeko Karmengo Amaren Jaiak. Protagonista nagusi bat izan zuten hasierako ekitaldiek: Garagunea. Sei urte dira barrutian ezarri zenetik zentroa, eta bertako kideek bai Trintxerpen egiten diren jai kutsuko jardueretan, zein urte osokoetan, ekarpena egiten dute. Horregatik, Jai Batzordeak erabaki du haiek omentzea festak bitartean. “Garagunearen proposamena jaso genuenean zalantza gutxi izan genituen baiezkoa emateko. Haiek merezi dute, egiten duten ekarpenagatik, aurtengo Karmengo Amaren txupinaren jaurtiketa egitea. Eskerrik asko Garagune”, esan zuen txupinazoaren aurretik alkateordetzan egindako ekitaldian Iraitz Pazos Trintxerpeko alkateordeak. Garagunekoak, hitzez eta ekintzez, arras eskertuak azaldu ziren. Harro jarri zuten festetako zapia. Harroago izan ziren suziriaren jaurtiketaren unean, “Gora Trintxerpe!” askotan esanez, oso pozik.
Atzo hasi eta igandean (hilaren 19an) bukatuko dira karmenak. Bitarte horretarako dozenaka dira Jai Batzordeak antolatutakoak. Horien artean, danborradak, sei denera: atzoko gizonena, Azkuenekoa, familiarra, emakumeena, gaurko marinelena, eta larunbateko haurrena. Haien ordezkaritza ere izan zen festen hasierako ekitaldian; horiek guztiak ordezkatzen dituzten banderek ere izan zuen presentzia udal aretoan. Horren aurretik, ordea, Holy festa egin zuten txikienek Gernika plazan, kolorez tindatu zituzten karmenen hasierako uneak.
Ekitaldian hainbat aitortza izan ziren. Batetik, Azkueneko damei (Candela Maneiro, Candela Vilanova eta Nora Pascual) ohorezko zapiak eman zizkieten, baita festetako kartelaren egile izan den Izaro Elgezabali ere. Sorpresa ere izan zen ekitaldi hartan: La Bombonerako abesbatzak bi kantu eskaini zizkien bertan ziren denei. Giro ederra sortu zuten. Indarrez betea. Festak hasi aurretik energiaz bete zuten alkateordetza.
Horiek eginda, kalera atera zen jai giroa. 20:00ak puntuan suziriak bota, eta gizonen danborrada burrunbaka hasi zen. Martxan dira karmenak. Beheko zerrendan, gaurko eta biharko egitarauak. Zaindariaren eguna dute gaur Trintxerpen, Karmengo Amaren Eguna.
Jarraian, atzo arratsaldeko jarduera horien irudi sorta.
Karmenak 2026. Datozen egunetako egitaraua.
Gaur (hilak 16, osteguna). Karmengo Amaren Eguna.
- 11:00: Apar festa, Gudari plazan.
- 12:00: Karmengo Amaren omenezko meza, Karmengo Amaren parrokian.
- 12:30: Bermuteka Gudari plazako txosnan.
- 17:00: Futbolin txapelketa, A 30 Nudos tabernak babestuta, Serafin Esnaola plazan.
- 17:00: Marinelen danborrada, Karmengo Amaren parrokiatik.
- 18:00: Tortilla txapelketa, Azkueneko parkean.
- 18:00: DJ Mikeltxi, Serafin Esnaola plazan. Ondoren, txokolate jana eta haur eta gaztetxoentzako dantza tailerra, Fama eta Txasissen eskutik.
- 19:00: 12 urtetik gorako gazte eta helduentzako puzgarriak, Gudari plazan.
- 20:00: Futbito txapelketako B mailako 3. eta 4. postuak, Azkueneko pistetan.
- 21:00: Futbito txapelketako B mailako finala, Azkueneko pistetan.
- 23:00: Karaokea, Gudari plazan.
Bihar (hilak 17, ostirala)
- 11:30: Puzgarriak, Serafin Esnaola plazan.
- 12:00: Tailerrak Garagunekoekin, Serafin Esnaola plazan.
- 17:00: Haurrentzako tailerrak, Azkueneko parkean.
- 18:00: Futbito txapelketako 3. eta 4. postuak, Azkueneko pistetan.
- 19:00: Futbito txapelketako finala, Azkueneko pistetan.
- 19:00: Erromeria gidatua, Serafin Esnaola plazan.
- 20:00: Arando Txiki abesbatzaren emanaldia, Karmengo Amaren parrokian.
- 20:30: Familia danborrada, Serafin Esnaola plazatik.
- 21:30: 1980ko hamarkadako arratsalde pasa, A 30 Nudos eta Erdibana tabernen eskutik, Serafin Esnaola plazan.
- 00:00: Psychoclown taldearen kontzertua, Gudari plazan.
- 01:15: DJ Beni, Gudari plazan.
- 01:30: DJ Aitana Grandes, Serafin Esnaola plazan.
