Antxok lurpeko geltoki berria du
Bihar irekiko dira ofizialki topoaren Altza-Galtzaraborda tartea eta Antxoko geltoki berria. Gaur inaugurazio ekitaldia egin dute ordezkari politikoek.
Antxoko lurpeko geltoki berria errealitatea da. Bihar (larunbata, hilaren 18a) irekiko dira ofizialki topoaren Altza-Galtzaraborda tartea eta Antxoko geltoki berria, eta herritarrei zabaldu aurretik, inaugurazio bidaia bat egin dute gaur Altzako geltokitik Antxokora. Bertan izan dira Imanol Pradales lehendakaria, Susana Garcia Chueca Mugikortasun Jasangarriaren sailburua, Teo Alberro Pasaiako alkatea, Jon Insausti Donostiako alkatea eta erakundeen ordezkariak.
Egindako jarduketetan Altzako gaur egungo zaku-hondoa, trenek errebotatzen zuten lekua, kendu da, eta horri esker topoen maiztasunak bikoiztuko dira, Antxo eta Altza Amararekin 7,5 minutuero lotuz. 2016ko irailean topoa Herreratik Altzara iritsi zen, eta orain Galtzarabordaraino iritsiko den bi bideko saihesbidea osatu da. Lanak Eusko Jaurlaritzako Mugikortasun Jasangarriaren Saileko Euskal Trenbide Sareak (ETS) gauzatu ditu, eta obra horien barruan kokatu da Antxoko lurpeko geltoki berria.
Orain, Antxo erdibitzen duen zubibidea eraitsi ahal izango da, antxotarrek “luzaroan itxarondako eta aldarrikatutako herri eraldaketari ekiteko”. Zubibidearen desagertzeak “Antxon lekua berreskuratzea, hiri integrazioa hobetzea eta barrutiko hainbat punturen arteko lotura indartzea ahalbidetuko” duela zehaztu du udalak.
Ordezkari politikoek Altzan hartu dute Antxoko geltoki berrira eraman dien topoa. Bi minutuko bidaia geltoki berrituan bukatu da, eta dantza eta txalaparta ikuskizun batekin hasi da ekitaldia. Sorkuntza lanen ondoren hitza hartu dute Pradalesek eta Garcia Chuecak, Antxoko geltoki berrian.
Honakoa adierazi du lehendakariak: “Mugikortasunak lurralde kohesioa, berdintasuna eta oreka bermatu behar ditu. Pertsonak jarri behar ditu erdigunean, datozen belaunaldiak barne, eta integratzailea eta jasangarria izan behar du. Topoa XX. mendearen hasieratik ehunka mila gipuzkoarren eguneroko bizitzaren parte izan da. Urtean 12 milioi bidaia baino gehiago egiten ditu. Denbora gutxian, topoa beste liga batean hasiko da jokatzen. Gipuzkoa lehen mailako hurbileko tren-sare bat osatzen aitzindaria izatea ahalbidetuko dugu. Nabarituko dugu eta gozatuko dugu”.
Bestalde, honakoa esan du Mugikortasun Jasangarriko sailburuak: “Eusko Jaurlaritzak berdintzen gaituen garraio publiko jasangarri eta eraginkor baten alde egiten du lan, gizartea eta lurraldea josten baititu, Gipuzkoa egituratzen baitu eta zeharkatzen duen ingurunea hobetzen baitu. Saihesbideak aro berri bat irekitzen du, Antxoko lan handiena izanik, aldi berean aukera ematen baitu herria bere inguruan hazten ikusi duen zubibidea eraisteko konpromisoa betetzeko, eta hori Antxo berri baterako beharrezko pizgarria izango da, herritarrentzat 3.500 metro koadro irabaziko baititu”.
Trazadura berria
Trazadura berria Altzatik hasten da, 2,1 kilometro ditu, eta lurpeko tunel bidez iristen da Antxora, ondoren Galtzarabordara joateko. Errenteria-Oreretan topoa kanpora ateratzen da. Orain, ETS bukatzen ari da trenbidea Galtzarabordan estaltzeko eraikuntza proiektuaren idazketa. Horrek barne hartuko du egungo geltokia ordezkatuko duen terminal berri bat eraikitzea eta egungo trenbide lubakia kentzea hiri espazio berri bati esker.
Antxoko geltokitik Gure Zumardia berrira iritsiko dira herritarrak. Plazara igogailu edo estalki bat duen eskailera bidez iritsi ahal izango da. Estalki hori koralina motakoa da, eta Norvegiako estudio batek diseinatu du. Koral erako hiru dimentsiotako egitura bat da, altzairu herdoilgaitzezkoa eta beirazko xafla finez estalia. Lurpean hall zabal bat dago bidaiariak alboko bi nasetara bideratzeko eskailera zein igogailu bidez.
Antxoko eraldaketari Gure Zumardia plaza gehitu behar zaio gogorarazi du udalak. Lurpeko geltokiaren gainean dagoen plaza berria da, eta behin betiko ireki da. Espazio publiko hori Pasaiako Udalak abian jarritako partaidetza prozesuan oinarrituta diseinatu da. Prozesu horren bidez, bizilagunek ingurune berriaren erabilerak eta ezaugarriak zehaztu ahal izan zituztela baietsi du udalak.
Honakoa adierazi du Teo Alberro Pasaiako alkateak nabarmendu duenez: “Gaur ez dugu trenbide azpiegitura bat bakarrik inauguratu; Antxorako etapa berri bat inauguratu dugu. Mugikortasuna hobetzea garrantzitsua zen, baina azaleran gertatzen den guztia ere garrantzitsua da: pertsonentzako espazioak berreskuratzea, barrera historiko bat kentzea eta udalerri atseginago eta kohesionatuago bat eraikitzen jarraitzea. Gure Zumardiak irudikatzen du udaletik defendatzen dugun lan egiteko modua: herritarrak entzunez diseinatutako eta Pasaian bizi direnen eguneroko bizitza hobetzeko pentsatutako espazioa. Topoaren eraldaketa lurpean hasten da, baina bere onurak, batez ere, gure kale eta plazetan ikusiko dira”.
Maiztasun hobeak
Altzako trenbide lotunea kentzek sarearen linea jarraitu bat sortzea ahalbidetu du, Donostiako auzoa ekialdean dauden geltokiekin zuzenean konektatuko baitu, Herreran tren aldaketa egin gabe. Bihartik aurrera Altzan eta Antxon maiztasun hobeak izango dituzte trenek, 7,5 minutuero hartu ahal izango baita topoa lanegunetan eta asteburu arratsaldetan, 15 minutuero asteburuaren gainerakoan eta 30 minutuero larunbat gauetan.
Maiztasun aldaketa horiek bi geltokietan zirkulazioak bikoiztea ekarriko du, lanegunetan 136tik 274ra igotzeko. Zerbitzua emateko, azken asteetan Euskotrenek 150 gidari baino gehiago prestatu ditu saihesbide berrian.
Hona hemen Imanol Saiz Gomez de Segurak egindako bideoa eta argazki sorta.
