Euskal Selekzioen ofizialtasunaren aldeko herri bultzada igandean Oreretan
Gizonezkoen Munduko Koparen finalaren egunerako (iganderako, hilak 19) herri agerraldia antolatu dute Errenteria-Oreretako Zumardian, 17:30ean.
Asteartean Irun eta Hendaia artean egin zen mobilizaziokoa da irudia. Gizonezkoen Munduko Koparen finalaren egunerako (iganderako, hilak 19) herri agerraldia antolatu dute Errenteria-Oreretan. Zehazki, 17:30ean izango da agerraldi hori, Gamon Zumadian. Horren ondoren Donostiara joateko gonbita egin diete hala nahi dutenei deitzaileek, Gipuzkoako hiriburuan 19:00etarako deitua duelako Bultzada Realaren zaleen taldeak mobilizazioa; Oreretatik Donostiara elkarrekin joatea da asmoa, 18:23ko topoan.
“Azken asteotan Espainiako selekzioaren inguruko sinbologia eta espainolismoaren adierazpenak areagotu egin dira. Futbolaren aitzakiapean espainiar nazionalismoa normalizatzen ari den bitartean, Euskal Herriak ofizialtasunik gabe jarraitzen du”. Horren aurrean, ezin dutela isilik geratu adierazi dute, “baliatu dezagun final arrotz hau Euskal Selekzioaren aldeko bultzada herritarrerako, nazio harrotasuna adierazteko eta autodeterminazio eskubidea eta ofizialtasuna aldarrikatzeko”.
Herriko gazte talde baten iniziatibaz, finalaren aurretik igandean 17:30ean Zumardian deitutako mobilizazioan parte hartzeko deia egin dute. Mezu argi batekin: Euskal Herriak ofizialtasuna orain. Gure koloreak, gure selekzioa. Herritarrei deia egin die taldeak: “Goazen kalera ateratzera, kaleak gure ikurrez betetzera”.
Era berean, onartezintzat jo dute partidak ikusteko eremu eta baliabide publikoak baliatu eta pantailak jartzea, “beraz, ondoren 19:00etan Donostian Bultzadak deitutako mobilizazioan parte hartzera gonbidatzen ditugu herritarrak”.
