Madalenen atariko txistu doinu gorenak
Madalenak hasi aurreko txistularien kontzertuak Pantxoa eta Peio izango ditu gonbidatu berezi. Festetako protagonistak ere goretsiko dituzte.
Astelehenko emanaldian izango direnetako hainbat, kontzertuaren aurkezpenean. Artistak aukeratu, haiekin harremanetan jarri, eta baiezkoa lortutakoan partiturak txistu doinuetarako moldatzea tokatzen zaie. Emaitza baino ez da ikusten kontzertu egunean, orain artekoa gorena beti, baina horren atzean lan eskerga dago, hilabete luzeetakoa. Aurten ere, Madalen Aurreko Txistulari Kontzertua izango da Madalen Jaien atariko. Hutsik egin gabe helduko da Udal Txistulari Taldearen eskutik. Festak hasi bezperan, astelehenean (hilaren 20an) izango da kontzertu handia eta aurtengo artista gonbidatuak Pantxoa Carrere eta Peio Ospital izango dira, Pantxoa eta Peio. Haiekin batera, Udal Txistulari Taldea, berrasmatzeko eta txistua ezohiko agertokietara eramateko abilezia apartekoa erakutsi duena.
Ez dira, baina, bakarrik ariko Zumardiko agertokian, bertara bilduko den jende oldeari ikuskizun ahaztezina eskaintzeko lanean lagun izango dituzte beste asko: Errenteria-Oreretako eta Euskal Herriko txistulariak; Jare Antzizar eta Julen Olaizola (bertsolariak); Ereintza Dantza Taldea; Coco Dance; Xanti eta Maialen (erraldoiak); Zaria abesbatza; Aritz Lonbide (tronpeta), Koldobika Salaberria (tronpa), Ricardo Navas (tronpeta), Txomin Ganborena (tronboia), Iñaki Albizu (tuba), Andoni Garcia (gitarra), Jose Luis Alonso (baxua), Iñaki Letamendia (bateria) eta Imanol Elizasu (teklatua). Aurkezle lanetan Garazi Urdanpilleta arituko da.
Sinergiak batzen sobera ohitua daude udalerriko eragileak, elkarlanerako prest, jakin badakitelako emaitza askoz ere ederragoa, askoz ere handiagoa dela elkarrekin jardunda.
Emanaldia, 19:30ean hasiko da eta bertan Pantxoa eta Peioren kanta ezagunak entzuteko eta gozatzeko aukera izango da. Azken dantza, Urtxintxak, Itziarren semea, Txikia, Bake mina… bikoaren kantu gutxi batzuk baino ez dira, eta horietako bateren bat entzuteko aukera izango da zalantzarik gabe asteleheneko kontzertu handian. Kantu aukeraketa asteleheneko kontzertuan emango dute ezagutzera.
Pantxoa eta Peio Errenteria-Oreretan izatea «ohore handia» izango dela esan du Iñaki Queralt Coira Herri Arte Eskolako presidenteak, «beraien betiko abestiekin gozatzea berezia izango da». Bakarlari gonbidatu berezia ere izango da aurten, Ekain Cachenaut uztariztarra. Cachenaut Euskal Herriko txistu bakarlarien txapelduna izan da azken hiru urteetan.
Kontzertuaren zuzendari artistiko Xabier Vesga Elizaldek azaldu du azaroan egin zutela lehen hartu-emana Pantxoa eta Peiorekin. Aurretik zerrenda bat du osatua udalak: aniztasuna, eta parekidetasunaren oreka mantentzea zein artisten beharretara egokitzeko aukera izatea dira irizpideak.
Garaiz ibiltzea garrantzitsua dela zehaztu du Vesgak. «Abestien moldaketak egin behar izaten dira eta horrek lana eskatzen du. Kasu honetan, kantu bakarra moldatu behar izan dugu; aurretik kontzertuak eginak zituzten Donostian eta Elorrion txistulariekin eta moldaketak eginak zituzten».
Aipamen berezia kontzertu horretan Indalezio Bizkarrondo Bilintx-i; omenduko dute, bere heriotzaren 150. urteurrenean, bere kantu Zaldi zuriarena joz.
Berritasunak aurtengo ekitaldian
Berritasunik ere bada; lehen aldiz madalenetako omenduari egingo zaion aitortza ere ekitaldi horretan egingo diote, Luis Mari Moreno Urretabizkaia Pirata oholtzara igoko baita, herriko kulturari, musikari eta jaietako bizitzari urte luzez egindako ekarpena aitortzeko. Orain arte kontzertu horren aurretik egiten zitzaion omenduari aitortza eta aurten, lehenengoz, biak batera egingo dituzte, beraz, kontzertu hasieran omenduko dute Pirata.
Ekitaldi horretan bertan banatuko dituzte ere aurtengo Madalenetako Kartel Lehiaketako sariak. Bertan jasoko dute aitortza Joseba Iñaki De la Callek eta Laia Maturanak, aurtengo kategoria orokorreko eta haurren kategoriako kartel irabazleen egileek.
Piratak Pantxoa eta Peio eta txistulariekin batera joko duen galdetuta ez dute aurrerabide handirik eman Queraltek eta Vesgak, «jakina, sorpresak egon daitezke. Egokiena Zumardira joan eta kontzertua entzun eta ikustea da». Vesgak abisua, aintzat hartzekoa: «Aurten kontzertua ordu erdi aurreratu dugu omenduaren ekitaldia batera egingo dugulako, eta beraz, 19:30ean hasiko da».
Orain artekoen balorazio ezin hobea egin dute biek. Fermin Muguruza, Eñaut Elorrieta, edota Alaitz eta Maider aritu dira txistulariekin batera kontzertu horretan besteak beste, «ikaragarria izan da emaitza guztietan». Zalantzarik ez dute aurtengoa ere aurrekoak bezain berezia izango dela. «Herritar guztiak animatu nahi ditugu parte hartzera, besteak bezala, Pantxoa eta Peio artista gonbidatu izango ditugun kontzertu hau ere errepikaezina izango delako».
