Festazaleak bizkortzearen arduradun izango dira
Bixkor txarangak girotuko ditu hilaren 22 eta 23ko dianak. Gazte-gazteak dira taldekideak, ia denak errenteriarrak. Ilusio berezia egiten die herriko festen zati goiztiar izatea.
Bixkorrekoak, Oiartzunen egin zuten saio baten ondoren.Bixkor Orereta Ikastolak 2023an antolatu zuen Kilometroak jaiak asko eman zion Errenteria-Oreretari. Tartean, txaranga bat. Izan ere, Bixkor txarangaren ernamuina ordukoa da: lagun talde bati urte hartako urriko lehen egun hura girotzeko «zerbait» prestatzeko eskatu zioten antolatzaileek, «musika instrumenturen bat jotzen zekien ia edonor atera zen talde edo txaranga hartan. Hura egin, eta gehiagotan errepikatu behar zela pentsatu genuen…». Esan eta egin. Serio jarri, Bixkor txaranga sortu, eta 2024ko Gaztañoko festetan egin zuten debuta. Bi urte bete berri dituzte, beraz.
Hilaren 22ko eta 23ko dianatan izango da Bixkor gaua bikain bukatu nahi dutenen buru. 06:00etan hasiko dira Errenteriako diana jotzen. Ehunka festazale izango dituzte alboan. «Lehengo astean, adibidez, Iruñean egon ginen. Toki askotan izan gara bi urte hauetan. Abentura batzuk egin ditugu jada» [barrez]. Baina herrian aritzea arras berezia da txaranga osatzen duten dozena bat musikarientzat. Aritz Otaegi eta Oier Bonail taldekideekin izan da HITZA; «gehienak Errenteriakoak gara, bertako musika eskolan ikasitakoak. Lezoko, Hondarribiko eta Donostiako kideren bat ere badugu. Baina beste denak herrikoak gara». Beraz, dianak girotu baino, biziko dituzte.
Iazko madalenetan jo zuten lehenengoz sorterriko dianan. «Sekulakoa da. Lagun artean jotzea izugarria da eta ilusio handia egiten digu». Gazte-gazteak dira bixkortarrak, 17-21 adin tartean dabiltza denak, beraz, duela ez asko dianaren beste aldean zirenetakoak dira. «Oso polita da hor barruan jotzen egotea. Ikusi izan dugu diana kanpotik, nola ez. Baina horren zati izatea sekulakoa da; bengalak pizten dituztenean bero-bero jartzen da dena…»
Bi kideek aitortu dute dianatara txarangakide gehienak ohea ukitu gabe joango direla jotzera, «gogorragoa izango litzateke altxatzea, gau osoan hortik gozatzen ibiltzea baino», barrez. Errenteriako diana-ren lehenengo notak jo, eta jendea saltoka eta algaraka hasten da. «Ordainezina da une hori».
Kanta klasikoak, eta berriak
Dianaz gain, madalenetan beste ekitaldiren batean ere izango da Bixkor, tartean Madalen Eguneko haurren danborradan. Gainera, txarangako hainbat kide Errenteriako Musika Kultur Elkarteko (EMKE) bandaren partaide dira, eta adibidez, hilaren 22ko eguerdiko kontzertuan (21eko txupinazoan ere izango dira) jotzen ariko dira. Hau da, gazte izan arren, eskarmentuko eta eskolako musikariak dira.
Errepertorio zabala dute. Txarangen unibertsoan klasikoak diren kantak zabaldu bai, baina garaian-garaian ospea duten era guztietakoak ere dituzte set-list-ean. «Adibidez, Iruñean, Quevedo abeslariaren La graciosa-k jarraipen iskanbilatsua izan zuen. Iaz, La Morocha-k asko funtzionatu zigun. Baina abesti klasikoek beti dute harrera ona. Gazte edo heldu, denen hankak mugiarazten dituzte betiko abesti horiek».
Kide guztiak bolo guztietan izatea zaila dela adierazi dute Otaegik eta Bonailek, eta tarteka «fitxaketaren bat» egiten dute taldeak oreka musikala gal ez dezan. Batez ere, herri txikitako festetan pasatzen dute hoberen euren doinuak zabaltzen, baina azaldu dute Donostiako Alde Zaharrean jotzea euren ametsetakoa dela, izan San Sebastian Egunean, edo beste festaren batean, «kale estuak dira hangoak. Gozamena litzateke han jotzea».
