Nafarroa etorbideko bidegorria, berrituta
Arditurri, Matxain eta Fenandez Landa plazetako tarteetan bost hilabetez aritu dira lanean bidegorriaren trazatua berritu eta egokitzeko.
Nafarroa etorbideko bidegorria bukatutaHerri bizia Nafarroa etorbideko bidegorria berritzeko lanak bukatu dituzte. Hala jakinarazi du udalak gaur. Bost hilabetez aritu dira Alabergako Arditurri eta Erdialdeko Matxain eta Fernandez Landa plazen artean lanean bidegorriaren trazatua berritu eta egokitzeko.
Lan horiek eginda, helburu zehatzak ditu udalak, ondokoak: autoaren erabilera murriztea, emisio kutsatzaileak murriztea, eta bizikleta garraiobide eraginkor gisa sustatzea, “bidegorri sarea hobetzeak, hiri irisgarriagoa, osasungarriagoa eta seguruagoa sortzen laguntzen du”. Lanek txirrindularien joan etorriak erraztu dituela adierazi du udalak, bidegorria eta seinaleak hobetu dituztelako lanek, baita bizikleten eta oinezkoen arteko bizikidetza bultzatu ere.
Denera 402.528,29 euroko inbertsioa egin du udalak lan horietan eta Europako FEDER funtsetatik egindako finantzazioa izan dute lanek.
Proeiktuak bidegorriaren ardatz nagusia osatzen du, hala azaldu du udalak, “eta hiru zatietan sortzen ziren arazoei irtenbidea eman die. Alaberga inguruan abiadura murriztu eta plaza ingurutik pasatzea saihestu du, Pilotari kalean eskola komunitatearekin bizikidetza, edo Matxain inguruan oinezkoen eta txirrindularien zirkulazioa bereiztea”.
Bidegorriaren trazaduraren diseinuan parte hartze aktiboa izan dutela herritarrek ere azaldu du udalak, eta lankidetza hori eskertu du. Kontzientzia hartzeko deia azkenik tokiko erakundeak, espazio publikoa elkarbizitzarako eremua dela nabarmenduta, espazio horren erabilera herritar denen ardura dela gogorarazi du “txirrindularien gehiegizko abiadurak, eta bizikleta erabiltzaileen zein oinezkoen praktika txarrek segurtasuna arriskuan jar dezakete, eta horrenbestez, ezinbestekoa da kontzientzia hartzea udalerriko ibilbideez gozatzeko”.
