Oiartzungo eta Errenteriako udalen bultzada boleibolari
Oarsoaldeko Boleibol Taldearekin elkarlana indartu dute bi udalek, eskualdeko boleibola sustatzeko.
Oarso Boleibol Taldeak Oiartzun eta Errenteriako udalekin hitzarmena egin du.Herri Bizia Oiartzungo eta Errenteriako udalek Oarso Boleibol Taldearekin elkarlana indartu dute. Horren atzean, boleibola Oarsoaldean sustatzeko asmoa. Lankidetza horren barruan, Oiartzungo udalak bere kirol instalazioak jarriko ditu Oarso Boleibol taldearen eskura, asteburuetan lehiaketaren partidak jokatzeko eta horrela, eskualde osoko kirol eskaintza indartzen laguntzeko.
Ez da lankidetzak eragingo duen alderdi bakarra, izan ere, Eskola Kirolaren eskaintza indartzeko aukera ere emango du. Aurreko denboraldian lehen aldiz, boleibol jardunaldia antolatu zen Beraungo pistetan; Oiartzungo kirol instalazioak eskura jarrita, datorren ikasturtetik aurrera eskaintza din guztietara zabaltzeko aukera izango da, pista gehiago izateak erraztuta aukera hori.
Boleibola sustatzeko aukera izango dute gainera, Elizalde eta Haurtzarok gorputz hezkuntzako eta eskola kiroleko saioetan. Akordioak gainera, Oiartzun eta Errenteriako udalen arteko elkarlana sendotuko du, “kirolaren bidez eskualdeko haur eta gazteei kalitatezko aukerak eskaintzeko konpromisoa berresten du. Oarso Boleibol taldearen hazkundea eta nesken kirol jardueraren garapena babesteko urrats garrantzitsua da”.
Oarsoaldeko eragileen arteko elkarlana “funtsezkoa” jo dute bi udalek, “baliabideak optimizatu eta herritarren beharrei egoki erantzuteko”. Hiru aldeko hitzarmena horren erakusle dela jarri dute nabarmen, ” Oarsoaldeko kirol sarea indartzen lagunduko du, boleibolaren garapena sustatuko du, eta emakumeen kirolari bultzada emango dio, eskualde osoaren mesedetan”.
Lau taldetik hamarrera
2023an sortu zuten Errenteria-Oreretan Oarso Boleibol taldea, hasiera batean nesken lau talderekin. Denbora gutxian, hamar taldera egin zuen jauzi eta 150 jokalari baino gehiago biltzen ditu egun, denak emakumeak.
