Agur Don Vito txapelketako zelaiari
Udalak 24 orduz zabalik egongo den aparkaleku bat egingo du bertan, eta Pontikara lekualdatuko da txapelketa datorren urtetik aurrera. Ostiralean jokatu ziren aurtengo finalak.
Urtero udari hasiera emateko egiten da Don Vito futbol txapelketa herrikoia, maiatza bukaeratik uztaila bitartean. Duela urte askotatik txapelketa hori Udal Euskaltegi ondoko futbol zelaian jokatu da, baina zelai horri agur esan zioten ostiralean. Errenteriako Udalak txapelketa bertan jokatzeko “erraztasunak” eman dituela jakinarazi dute antolatzaileek, materiala gordetzeko lokal bat utziz edota komun eta zakarrontziak zelai gunean jarriz.
Aurtengo edizioa prestatzen hasi zirenean, udalak Don Viton aparkalekuak egiteko nahia plazaratu zien txapelketako antolatzaileei. Orain arte soilik gaueko aparkalekua izan den zelaia 24 orduz zabalik egongo den aparkaleku bilakatu nahi du udalak, bertan beharrezko obrak eginez. Sustatzaileek adierazi dute hasieratik elkarlanean aritu direla udalarekin, eta beste gune bat topatzeko aukerak eman dizkietela.
Pontikako futbol zelaia.
Aurten denboraz justu ibiliko zirenez, betiko lekuan jokatu da Don Vito, baina datorren urtetik aurrera Pontikako futbol zelaian jokatuko da txapelketa herrikoia. Pontikatik Beraunera igotzen hasita errepide ondoan dagoen zelaian jokatuko da txapelketa datorren urtetik aurrera, eta bertan materiala gordetzeko lokal bat utzi dio udalak antolakuntza taldeari.
Ostiralean agurtu zuten hainbeste urteren ondoren txapelketaren “bereizgarri” izan den zelaia, egun horretan jokatu baitziren aurtengo finalak. Aurtengo txapelduna Haxixa taldea izan da, finalean Borussia penaltitan garaitu ondoren. Kontsolazioko finalean Lagartok Recre menderatu zuen, hori ere penaltitan. Finalaren ondoren, parrillada herrikoia egin zuten aurtengo txapelketan murgilduta egon diren kide guztiek, eta txapelketa agurtzeaz gain, zelaiari ere agur esan zioten denek.
Antolatzaileek eskerrak eman dizkiote udalari beste zelai bat topatzeko eman dizkien erraztasunengatik, eta baita jokalari eta zale guztiei ere: “Zuek ere honen parte zarete”. Datorren urtean Pontikan ikusiko dute denek elkar, hemendik aurrera han egingo baitu bidea Don Vito txapelketak.
Hona hemen finaleko argazki batzuk, antolakuntzak HITZAra bidaliak:
