Soinuenea eta euskaren aldeko jarrera "ausartak" izan dituztenak omenduko dituzte
Xanistebanetako kultur ekitaldian omenduko du Soinuenea udalak. Sokadantzako protagonistak "euskararen aldeko jarrera eta jardun ausartak izan dituztenak" izango dira.
Xanistebanetan, “herriko bizitzari ekarpen garrantzitsua egin dioten eragileak eta herritarrak” omenduko ditu, beste behin, Oiartzungo Udalak. Hartara, abuztuaren 1eko kultur ekitaldian Soinuenea Herri Musikaren Txokoari egingo diote aitortza, eta abuztuaren 2an, haatik, “biderik errezena ez izanagatik euskararen aldeko jarrera eta jardun ausartak izan dituzten norbanako, erakunde eta eragileak” izango dira nagusi.
Udaleko ordezkarien arabera, “balio handiko ondarea sortzeagatik eta proiektu zabal bezain eder honen sehaskatzat Oiartzun aukeratu izanagatik egin nahi zaio aitortza” Soinueneari. Hitzordua Landetxen izango da, 18:00etan hasita.
Abuztuaren 2ko sokadantzari dagokionean, berriz, udaletik diote “komunitatea” islatzen duela: “Kalean elkarrekin topo egiten dugun herritarrak gara elkarri eskutik helduta dantzan aritzen garenak. Guztion osatzen dugu Oiartzun, guztiok elkarrekin ari gara etorkizuna sortzen, eta etorkizun hori euskaraz izatea nahi dugu. Hori hala izateko, beharrezkoa da orain arte txingurri lanean aritu direnen jarduna, lan hori errekonozitzea, eta, bidea eten ez dadin, etorkizuneko herritar konsziente eta konprometituak sortzea. Datu soziolinguistikoek zein jazoera sozial edota politikoek argi uzten dute euskara larrialdi egoeran dagoela eta guztiok garela beharrezkoak pizkunderako. Eta guztiok gara beharrezkoak festarako ere”.
Azkenik, jakinarazi dute suziria Urmendi Udal Ikastola Partzuergoko kideek piztuko dutela. 30 bat iradokizun jaso dituzte orotara, eta jai batzordeak txupinazoa Urmendi haur eskolak botatzea erabaki du “azken 30 urtean herrian egindako lana eta herriari egindako ekarpena goraipatu eta eskertzeko”.
