Josetxo Etxandiko horma, sendoagoa
Goiko Plazako pilotalekuko horma nagusia eraberritzeko lanak hasi ditu udalak. 46.700 euroko aurrekontua dute.
Lanei ekiteko eremua hesitu dute.Lezoko Udala Goiko Plazako Josetxo Etxandi pilotalekua berritzeko lanak abiatu ditu Lezoko Udalak. 1926ko sortze data duen kirol azpiegituraren horma nagusia konpontzeko lanak dira zehazki, eta 46.700 euroko aurrekontua dute. Obren xede nagusia izango da horma horren akaberak berritzea, eta hura osatzen duten harriei behar duten tratamendua ematea, egituraren kontserbazioa eta iraunkortasuna bermatzeko. Horma sendotuko dute.
Lan sakon horiez gainera, paretako orbainak eta pitzadurak konponduko dira, eta horien segidan ekingo diote margotze lanei. Horma horren goialdean ere esku-hartzea egingo dute, hezetasunak kaltetu baitu zati hori.
Udalak azaldu du lan horiekin herriko kirol instalazioak mantentzeko eta hobetzeko konpromisoari eusten diola, “Josetxo Etxandi pilotalekua datozen urteetan ere herritarren erabilerarako egoera onean mantentzeko”.
