Donibane eta Orio, nor baino nor gehiago
Donibaneko santioen egitarauaren barruan, San Juanen eta Orioren arteko desafioa egingo dute Santiago plazan hilaren 30eko arratsaldean.
Iaz Zumaiarekin neurtu zituzten indarrak sanjuandarrek.Oier Iriarte Santioen programazioaren barruan, jaietan ohiko bihurtu den herrien arteko desafioa egingo da hilaren 30ean (Ez Gaude Denok egunean) Santiago plazan, 18:30etik aurrera. Donibaneko presoen aldeko mugimenduak antolatu du desafioa, eta aurten, Oriorekin neurtuko dituzte indarrak sanjuandarrek.
Donibanen urteak daramatzate herrien arteko desafioak antolatzen. Iraganean pertsonen arteko erronkak egiten zirela jakinarazi du Jurgi Aldalur Rodriguez antolatzaileak; baina duela 10 urtetik-edo, herrien arteko probak egiten dituzte. Azken hamarkadan San Pedro, Intxaurrondo, Oiartzun, Lezo, Hernani, Astigarraga edota Zumaia pasa dira Donibanetik. Aurten Orio izango da santioetan.
Talde bakoitzak zortzi partaide izango ditu, launa gizon eta emakumez osatutakoak. Desafioa hiru ataletan banatuko dutela aurreratu du Aldalurrek, eta parte hartzaileak esparru ezberdineko probetan aritu beharko dira: igeriketan, kontrabandista lasterketan, ergometroan, txingetan, lokotxetan, ingudean, traktore gurpilean, eskaladan eta sokatiran.
Desafioa egiteak helburu bikoitza duela adierazi du Aldalurrek: preso eta iheslariei elkartasuna adieraztea, haien aldeko egitasmoa baita, eta herrien arteko harremanak sustatzea. Hasiera-hasieratik jarduerak herritarren babesa izan duela zehaztu du antolatzaileak: «Herritarrengandik erantzun ona jaso dugu beti, eta goraka doan jarduera bat da. Jende asko animatzen da, oso giro ona sortzen da eta parte hartzaileak gustura joaten dira beti». Parte hartzaileak, gainera, ez dira bakarrik egongo, aurten ere Oiartzungo dultzaineroek Santiago plaza eta herriko kaleak girotuko baitituzte desafioa bitartean.
Herrien arteko harremanak sendotzen jarraitzeko, oriotarrak afaltzeko egingo den barrikotera gonbidatu dituztela baietsi ditu Aldalurrek.
