Asteburua ez du aldekoa izan Hibaikak
Zazpigarren postua egin dute Euskotren Ligan errenteriarrek Getxon; Gizonen ontzia hamaikagarrena izan da larunbatean Sestaon jokatutako estropadan, eta zazpigarren Zumaiakoan igandean.
Hibaikako arraunlari seniorrak Ez dute aldeko asteburua izan uretan Hibaikaren bi eskifaiek uztaileko azkena. Bina estropada izan dituzte jokoan, gorabeheratsua emakumeen lehena. Euskotren Ligak Donostiako Fabrika Bandera zuen jokoan larunbatean baina itsasoaren baldintzek kezka eragin zieten arraunlariei eta klubei. Euskotren Ligaren erabakiaren zain, arraunlariak beraiek izan ziren planto egin eta halako baldintzetan uretara ez zirela aterako erabaki zutenak.
Pilota arraunlarien teilatuan eta euren osotasunaren alde egin zuten, bermerik ez zelako. Erabakia hartu eta gero, berandu, heldu zen estropada hori bertan behera uzteko ligaren erabakia. Hurrengo egunean, igandean Getxon zuten lehia Iñaki Mendizabalenak, eta ez zuten emaitzetan bederen ohiko markarik lortu, zazpigarren sailkatuta.
Sailkapen orokorrean seigarren postuan dira errenteriarrak eta tarte dezentekoa dute atzetik diren Zumaia eta Donostiarrarekin, hamar puntura eta 11ra dituzte bi ontziak, hurrenez hurren. (Emaitzak kontsultatzeko klik hemen)
Mendizabalek prestatutako taldea datorren asteburuan jarri du orain fokua; bi egunekoa da hori er: larunbat arratsaldean Santurtzin ariko dira eta igande goizean, berriz, Lekeition 11:25ean hasita. ETB1n ikusi ahalko da bi egunetan estropada.
Hibaikako gizonek ere ez dute aldekoa izan asteburua. Sestaon 11. postuan sailkatu ziren Dani Cobjuckek prestatzen dituenak. Horrek Lapurdirekin zuten distantzia murriztea ekarri zuen, eta hura dute arerio zuzena play offa ekidin nahi badute. Bederatzigarren sailkatuta jarraitzen du KAE1eko sailkapen orokorrean Hibaika baino Lapurdik asko murriztu du distantzia puntu bakarreraino errenteriarrengandik. Asier Martin arraunlariak azaldu zuen estropada gogorra izan zela larunbatekoa Sestaon, haizeak eragin ziela asko, “ez da gure estropada onena izan, baina bihar beste estropada daukagu Zumaian, eta buelta ematea tokatzen zaigu”.
Zumaiakoan ere ez ziren gustura gelditu Cobjucek entrenatzen dituenak, batez ere, Lapurdi gehiago izan zelako txanda irabazita. Hibaikakoen sentsazioak ez ziren onak izan nahiz eta azkenean zazpigarren sailkatu ziren, bigarren txandan aritutako lau ontzietatik hiruk baino denbora hobeagoa eginda. Eguraldiak okerrera egin zuen bigarren txanda horretan, eta hori aldeko izan zuten lehen txandako ontziek. Orain arte erakutsi duten mailaren azpitik aritu dira bi egunetan, baina taulan erdiko postuetan sailkatzeko gaitasun betea dutela argi erakutsi dute. Emaitzak ikusteko klik egin hemen.
Horretarako aukera izango dute datorren asteburuan; zerotik hasi eta gora egitea tokatuko zaie bederatzigarren postu horri eusteko eta horrenbestez, play offa saihesteko. Lehia bikoitza, etxetik urrun bi estropadak, Kantabrian: Pedreñan larunbatean 18:30ean hasita eta Santanderren igandean, 12:00etan hasita.
