Donostiako Klasikoak eragina izango du trafikoan
Larunbatean jokatuko da goi mailako txirrindularitza proba, eta lasterketak trafiko aldaketak sortuko ditu Donibanen eta Antxon.
Donostiako Klasikoan txirrindulariak Larunbatean (abuztuaren 1ean) txirrindularitzako Donostiako Klasikoaren 45. ekitaldia jokatuko da. Urtero bezala, goi mailako txirrindularitza proba hori Pasaiatik pasako da, eta trafiko aldaketak sortuko ditu Donibanen eta Antxon.
Donibaneko irteera itxita egongo da 13:45etik 15:30era bitartean, lasterketa Jaizkibelera sartzeko bidegurutzetik pasatzen delako. Jaizkibelerako sarbidea ere itxita egongo da ibilgailuentzat.
Antxori dagokionez, Nafarroa etorbidera (lehengo N-1) doan irteera ere itxita egongo da 13:45etik 16:30era bitartean. Antxora sartzeko eta bertatik ateratzeko, Oarso kaleko biribilgunea erabiltzea gomendatu du udalak.
Aipatutako ordutegiak gutxi gorabeherakoak direla adierazi du udalak, eta probaren garapenaren arabera aldatu daitezke.
