"Jendetsuak eta alaiak izan dira festak"
Gertakarien alorrean, indarkeria matxistarekin lotutako atxiloketa, eta udal langile batek izandako laneko istripua suziri jaurtigile ari zenean.
Bantzaldia.Herri Bizia Jaien balorazio positiboa egin du oro har gobernu taldeak, haiek bukatu eta gutxira, “jendetsuak eta alaiak izan dira”. Jai batzordeari zein jaien aurretik zein horien testuinguruan giro ona sustatzen parte hartu duten elkarte, eragile eta norbanakoei eskerrak eman dizkie gobernu taldeak, “euren lana eta konpromisoa ezinbestekoak izan dira jaiak hain osoak eta anitzak izan zitezen”. Luis Mari Moreno Urretabizkaia Piratari ere aipamena gobernu taldeak, “musika arloan herriko kultur bizitzan baita madalenetan ere egin duen ekarpena aitortu nahi dizkiogu, Aurten oso berezia zian da bere protagonismoa, jaiak berekin partekatzea ohorea eta luxua izan da”.
Udal departamenduei ere eskerrak, bereziki madalenetan zehar lanean aritu direnei: “Kultura, udaltzaingoa, hiri mantenua, komunikazioa eta hirigintza udal langileei, baita babes ofizialeko kideei ere”.
Gertaera ilunen artean bi aipamen: suziri jaurtigile batek Madalena Egunean izandako istripua; erredura larriak izan zituen ezker eskuan istripuaren ondorioz udal langileak, “elkartasuna adierazi nahi diogu”. Bestetik, gizon bat atxilotu zuen Udaltzaingoak, 70 urtekoa, indarkeria matxistarekin lotuta. Ukituak egin zizkien bi emakume gazteri. Azken horiek berehala jo zuten erasoen kontrako informazio puntura, eta udaltzainek berehala atxilotu zuten erasotzailea.
Herritarren segurtasunarekin lotuta ez dela gainerakoan gertaera larririk izan esan du gobernu taldeak, “hori egindako prebentzio lanari esker izan da horrela. Lapurreta saiakerak ere iazkoan baino gutxiago izan dira”.
Barkamena ere eskatu du gobernu taldeak. Izan ere, kale igogailuak 24 orduz izango zirela martxan esan bazuen ere eta hala agindu, hilaren 21eko gauean erabiltzaileek ez zutela horiek baliatzeko aukerarik izan azaldu du, “mantenua egiten duen enpresari igogailuak 24 orduan martxan ziateko agindua eman bazion ere udalak, enpresaren akats batengatik lehen gauean ez ziren martxan izan”.
Herritarrei “zorionak” eta “eskerrak”, parte hartzeagatik eta dena ongi joan zedin egindako ekarpenarengatik, “errespetuzko eta elkar zaintzeko jokabideak nagusitu dira”. Jaiek sortutako eragozpenen aurrean herritarrek erakutsi duten ulermena eta pazientzia eskertu du bukatzeko.
