Aurrera doaz Azkuene Goiako baratze parkeko lanak
Abuztu hasieran garbiketa lanak egingo dira, eta irailean hasiko da azpiegitura nagusiaren eraikuntza.
Aurrera doaz Azkuene Goiako baratze parkeko lanak. Pasaiako Udalaren arabera, jarduketa horien helburua da erabilera publikoko naturagune berriak sortzea, aisialdia, ingurumenaren zaintza, herri baratzeak eta auzoko bizikidetza uztartzeko.
Udalak 2025ean abiatu zituen lehen lanak, proiektuaren lehen fasearen barruan, ekialdeko baratze eremua egokituz. Parkearen garapena erabat osatzeko, beste lau fase gauzatu behar dira oraindik. Horretarako, udalak proiektua eguneratu du aurten, hurrengo esku hartzeak definitzeko eta lanen plangintza egokitzeko.
Testuinguru horretan, uztaila eta abuztuan zehar eguneratutako proiektu horren lehen fase berria esleituko du udal erakundeak. Jarduketa horiek iaz hasitakoei jarraipena emango diete, eta parkearen garapenaren urrats garrantzitsuak izango dira.
Garbiketa
Azken hamarkadetan eremu horrek izan duen erabilera dela eta, udal lurretan hondakinak, material metaketak eta arauz kanpoko egiturak pilatu dira. Udalaren arabera, egoera horrek zaildu egin du aurreikusitako obrak egitea.
Hori dela eta, ekaina bukaeran udalak bando bat argitaratu zuen eta inguru horietan abisuak jarri zituen, gaur egungo erabiltzaileei lur publikoetan pilatutako materialak erretiratzeko eskatzeko. Nahiz eta hainbat elementu dagoeneko kendu diren, udalak jakinarazi du oraindik ere badirela erabilera pribatura bideratutako espazioak eta legez kanpoko eraikuntzak. Orain, uztaila bukaeran eta abuztu hasieran, udal erakundeak garbiketa lanekin jarraituko du, urteetan zehar metatutako materialak eta egitura irregularrak kentzeko.
Irailean, azpiegitura nagusiak
Garbiketa lanak bukatu ondoren, irailetik aurrera parkearen fase berriari ekingo dio udalak. Jarduketa horien barruan, baratze parkeko ibilbideak eta oinarrizko azpiegiturak eta euri urak biltzeko sistema berriak eraikiko dira. Horrez gain, parkearen puntu baxuenean (Ulia etorbidea 12 atzealdeko aparkalekuaren inguruan) euri lorategi bat sortuko da, uraren kudeaketa jasangarria eta ingurumenaren hobekuntza sustatzeko.
Halaber, jolas eremuaren lehen elementuak ere jarriko dira. Elementu horien artean izango da tirolina, Pasaiako haur eta nerabeek udalaren Eskubidean parte hartze programaren bidez egin duten proposamenetako bat, eta udal gobernuak proiektuan txertatu duena.
Azkuene Goiako baratze parkea Pasaian naturagune publiko berria sortzeko udalaren estrategiaren parte dela adierazi du udal erakundeak, “herritarren bizi kalitatea hobetzea, biodibertsitatea sustatzea eta auzoaren eraldaketa jasangarria bultzatzea helburu dituena”.
Baratze parkearen lanak Europako Batasunaren FEDER funtsen bidez finantzatu ditu udalak. Garbiketa lanak, aldiz, Gipuzkoako Foru Aldundiaren Jasangarritasun Sailaren laguntzarekin egingo dira.
