Batelerak sailkapenaren goialdean sendo dira
Emakumezkoen trainerua Euskotren Ligako hirugarrena da, gizonezkoek, berriz, ahazteko asteburua izan dute. Sanpedrotarrentzat asteburu gazi-gozoa izan da.
Pasaitarren hiru traineruek denetik izan dute asteburuko estropadetan. Eusko Label, Euskotren eta KAE 1 ligek bina estropada izan dituzte Bizkaian eta Kantabrian, hain zuzen. Hiruen artean batelerak izan dira emaitza loriatsuak lortu duen traineru bakarra: larunbatean, Santurtzin, laugarrenak izan ziren; eta igandean, Lekeition, hirugarren.
Ohorezko txandan sendotuta, larunbatean ezin izan zuten sailkapenean atzetik duen Astillero gailendu. Hasieratik lehia oso estua izan zuten kantabriarrekin, eta azkenean, segundo bakar batengatik ezin izan zuten hirugarren egin. Igandean, itsaso zabaleko estropadan, lehenengo luzean Astillerorekiko aldea ateratzea lortu zuten, eta irabazitako segundo horiei eutsi. Tolosaldea hiru segundora izan zuten helmugan. Horrela, denboraldia amaitzeko sei estropada falta diren honetan, Donibaneko emakumeak hirugarrenak dira, 52 punturekin. Bigarren postua zortzi puntura dute, eta laugarrena bederatzira.
Gizonezkoek, berriz, oso bestelako asteburua izan zuten. Sailkapeneko hamargarrenak dira, 45 puntu pilatuta. Asteburu honetan, ezin izan dute zakua handitu. Larunbateko Ibaizabal ibaiko uretan jokatutako estropadan, hasiera ona egin arren, ez zuten estropada borobiltzeko indar nahikorik izan. Azkenean hamargarrenak izan ziren. Lekeition, itsasoan, ez zuten amestutako eguna izan. Larunbateko mamuak uxatu ezin, sailkapeneko azkenak izan ziren.
Erregulartasunaren bila
Maila bat beherago, KAE 1 ligan, San Pedroko ontzia bigarren txandan aritu zen Pedreñan eta Santanderren. Larunbatean, txandakideak oso aurretik aritu ziren hasieratik eta helmugan hamaikagarrenak izan zen Libia. Igandean, larunbateko jarduna hobetzea lortu zuten. Asteburuko bigarren estropadan gauzak oso bestelakoak izan ziren, eta bigarren txanadan arituta ere, txandako bigarrenak izan ziren, Astilleroren atzetik. Emaitza guztiak batuta estropada amaieran seigarrenak izan ziren. Sailkapen orokorrean ere seigarrenak dira, 64 puntu lortuta. Denboraldia amaitzeko bost estropadaren faltan, seigarren postuari eustea izango dute helburu.
Datorren asteburuan, Eusko Label zein Euskotren ligetako ontziak Ondarroan eta Hondarribian izango dira. KAE 1 liga, berriz, Hondarribian eta Errenterian jokatuko da.
