Oiartzungo ordainlekuak sei bide izango dute aurrerantzean
AP-8ko ordainlekuaren berritze-lanak azken fasean daude, eta gaurtik aurrera bide guztiak irekita egongo dira.
AP-8ko Oiartzungo ordainlekuaren berritze-lanak amaitzear dira. Gaurtik aurrera, hilak 3, estazioko sei bideak erabilgarri egongo dira. Obren azken faseari ekin diote, eta dagoeneko bide guztiak ireki dituzte. 2025eko irailean hasi zituzten ordainlekua eraberritzeko obrak, eta makineria eta portiko zaharrak kendu ondoren, ordainlekua goitik behera berritu dute; baita errepidea asfaltatu eta bideak margotu ere. Horrela, Behobiako noranzkoa duten hiru bide izango du ordainlekuak, eta beste hiruak, Bilboko norabidean. 3,5 milioi euroko aurrekontua dute guztira, eta aurreikuspenen arabera azken fasea irailerako amaituko dute.
Berritze-lanei esker, bi bideetan (noranzko bakoitzeko bat) Abiatu eta VIA-T gailua duten erabiltzaileek gelditu gabe igarotzeko aukera izango dute. Bestalde, ordainketa modu guztiak onartzen dituzten lau makinak jarri dituzte; bi noranzko bakoitzeko. Hau da, telefono mugikorraren, erloju adimendunaren eta banku-txartelaren bidez kontakturik gabeko sistema erabilita ordaintzeko aukera izango dute. Eskudirutan ordaintzeko aukera ere mantendu dute.
Uztailaren 4an, portiko berria jarri zuten, eta egunotan bide guztietan panel berriak instalatzen eta bestelako probak egiten ari dira. Sistema guztiak portikoetan sartzen amaitzean, lanak egin bitarteko behin behineko instalazioak kenduko dituzte. Aipatu beharra dago berritze-lanak ordainlekua martxan mantenduta egin direla, eta uneoro bi noranzkoak erabilgarri egon direla.
