Landarbaso Abesbatza Suedian izango da kantuan
Bihartik, hilak 6, 16ra bitarte, 'World Choir Games' lehiaketan izango da; nazioarteko abesbatza lehiaketarik ospetsuena eta zorrotzena da.
Landarbaso Abesbatza Errenteria-Oreretako erreferenteetako bat da, baita nazioarte mailakoa ere. Bihartik, hilak 6, datorren igandera, hilak 16, bitarte, munduko abesbatza onenekin arituko da kantuan World Choir Games nazioarteko txapelketan, Suedian. Bertan, 200 abesbatza izango dira hemeretzi kategoriatan banatuta. Landarbaso Abesbatzak lehen aldiz parte hartuko du, bertan izatea egindako ibilbide artistikoaren beste aitortza bat dela diote. “Parte-hartze honekin, Landarbaso Abesbatzak Euskal Herriko abesbatza-erreferente nagusietako bat izaten jarraitzen du, Errenteria, Gipuzkoa eta Euskal Herriaren izena nazioarteko musika-agertokirik ospetsuenetako batera eramanda”.
World Choir Games nazioarteko lehiaketa ospetsuena eta zorrotzena da, eta bi urtetik behin antolatzen dute. Aurtengoa 14. edizioa izango da, Suediako Helsingborg hirian. “Elkarrekin abesteak nazioak elkartzen ditu” lelopean, kontzertuak, musika topaketak, tailerrak eta desfileak egingo dituzte jaialdiaren baitan. Epaimahaiari dagokionez, ospe handiko zuzendari, pedagogo eta interprete nabarmenenak izango dira; horrek maila goreneko ebaluazio artistikoa bermatuko du.
Landarbaso Abesbatzak Musika Garaikidearen eta abesbatza mistoen kategorian parte hartuko du, eta horretarako, urtean zehar maila altuko programa landu behar izan dute. Landarbaso Abesbatzak hilabeteak eman ditu lehiaketaren eskakizun artistiko eta teknikoei erantzuteko berariaz sortutako errepertorio bat prestatzen. Aukeratutako abestiek afinazioari, soinu-orekaren kontrolari, adierazkortasunari, zehaztasun erritmikoari eta ahots-kohesioari lotutako erronka handiak planteatzen dituzte. Honela, Landarbasoren nortasun artistikoa eta lan koral zorrotzarekiko konpromisoa islatzea du helburu.
Suedian izatea taldearen nazioarteko proiekzioan aurrerapausoak ematen ari delako seinalea da, eta lehiaketa honek aukera emango die Euskal Herrian garatzen den musika koralaren maila handia erakusteko. “Euskal abesbatza-ondarea mundu osoko milaka parte-hartzaile, espezialista eta zaleren aurrean zabaltzen lagunduko du”, adierazi dute.
