Lehia handiko eguna izango da igandea, Oiartzun ibaian
Etzi, hilak 9, XIII. Errenteria Hiria jokatuko dute KAE 1 ligako hamabi ontziek, 13:00etan hasita; erlojupekoa izango da eta bi luzeetara erabakiko da irabazlea.
Bost estropada besterik ez dira geratzen aurtengo KAE 1 amaitzeko. Aste honetan, Bidasoan eta Oarsoaldean jokatuko dira estropadak, Hondarribian eta Errenterian. Igandean, Oiartzun ibaian izango dira KAE 1 ligako hamabi ontziak, XIII. Errenteria Hiria banderaren bila. Erlojupeko estropada izango da bi luzeetara 13:00etan hasita, eta ikusleek arraunlariak bertatik bertara ikusteko aukera izango dute. “Kantauri osoko estropada gutxik ematen dute Oiartzun ibaiak ematen duen gertutasuna”, azpimarratu dute.
Liga hasi zenetik hilabete eta erdi pasa da, eta 11 bandera jokatu ostean, Zarautz eta Deusto lehenengo postuetan dira 124 punturekin berdinduta. Biak nor baino nor ariko dira gelditzen diren estropada guztietan. Etxeko traineruak, Hibaikak, Lapurdirekin lehia zuzena du, errenteriarrak hamargarrenak dira Donibane Lohitzunekoekin berdinduta. Gelditzen diren estropadetarako helburu argia dute Lapurdi estropadetan gailentzea eta bien artekoen tartea handitzea, playoffetarako hamargarren postua saihesteko. Hortaz, igandeko lehiak zeresan handia izango du, sailkapeneko goiko postuetan eta azpialdekoetan.
Herriko arraun zaleen zita garrantzitsuena da igandekoa, eta klubak eskerrak eman nahi izan dizkie antolakuntzan izan direnei: “Estropadak erronka handia suposatzen du giza-baliabide eta antolakuntza logistiko aldetik, bai klubarentzat bai herriarentzat”. Dagoeneko igande eguerdirako plana dute herritarrek: Oiartzun ibaira hurbiiltzea eta arraunaz gozatzea, Hibaikaren kamiseta jantzita. “Etxekoek animoak behar dituzte eta zuen berotasuna ezinbestekoa izango da”, adierazi du klubak. Bandera honen ostean soilik hiru estropada geldituko dira, hortaz, Madalen traineruko arraunlariek herritarren animoak behar dituzte azken txanpari aurre egiteko.
