"Oiartzunek ederki erantzun dio festari; fin-fin gozatuz, goxatuz eta disfrutatuz"
Oiartzungo Udalak Xanistebanetako balorazio oso positiboa egin du; giro sanoa eta elkarbizitza azpimarratu ditu jaien biharamunean.
Xanistebanak amaituta, balorazioa egiteko garaia heldu da. Oiartzungo Udalak balorazio oso positiboa egin du jaien biharamunean, eta egunez zein gauez herrian izan den giroa nabarmendu nahi izan du Joana Mendiburu alkateak. “Goraipatzekoa da ekitaldi guztietan izan den antolakuntza eta koordinazio lan ona; eta herritarren zein eragileen parte hartzea”, azpimarratu du. Alkateak eskerrak eman nahi izan dizkie festa hauetan lanean egon diren udal langileei eta boluntario guztiei. “Oiartzunek ederki erantzun dio festari ere: fin-fin gozatuz, goxatuz eta disfrutatuz”.
Kaleetan haurrak, gazteak eta helduak izan dira egunotan, eta une zoragarri eta hukigarriak bizitu dira. Jaiek duten garrantzia goraipatu du, jendea elkartzeko topalekua izan baitira. “Azkar bizi garen gizarte honetan, denbora pixka batean gelditzeko aukera ematen dute festek”, gehitu du.
Eraso matxistei eta arrazistei dagokienez, ez dute intzidentziarik izan egun hauetan. “Oso pozgarria da Xanistebanak genero eta jatorri guztietako pertsonentzako jai atseginak izan direla pentsatzea”. Tratu ona eta poza izan dira festen protagonistak, eta gauzak horrela, ez da beharrezkoa izan adostutako protokoloak martxan jartzea.
Garbitasunaren eta jasangarritasunaren kontuarekin ere oso pozik azaldu da alkatea. Doneztebe plazan jarritako komun moduluek harrera ona izan dutela aipatu du, baita hondakinak birziklatzeko jarritako bitartekoak ere. Bestalde, garraio jasangarriaren aldeko apustu sendoa egin dute aurten ere. Xorrolaren gaueko zerbitzuak eta Ekialdebusen zerbitzuak oso ongi funtzionatu dute.
