Etxekoak etxean, maila onean
Gaur goizean XIII. Errenteria Hiria bandera jokatu dute KAE 1 ligako ontziek; Deustuk nagusitsunez irabazi du; Hibaikak bosgarren egin du.
Lehia handiko goiza izan da Oiartzun ibaian. Hamabi ontzi, bakoitza helburu batekin. Aurtengo KAE 1 liga maila handikoa izaten ari da, orain arte jokatutako estropada guztietan hala izan da. Gaur, Oiartzun ibaian izan dira hamabi ontziak, bi luzeko erlojupekoan, XIII. Errenteria Hiria banderaren bila. 13:00tan hasi da estropada baina ordubete lehenago giroa nabaria zen Oiartzun ibaiaren ibaiertzean, eta Altzate auzoko harmailak berehala bete dira. Bere taldea animatzeko txokorik onena harrapatu nahian ibili dira arraunzaleak. Uretan, berriz, tentsioa nabaria zen arraunlarien artean estropada hasi baino lehen.
Gaurko bandera jokatuta, hiru bandera besterik ez dira gelditzen aurtengo liga amaitzeko. Minutu bateko tartearekin hamabi ontziak irteera puntutik Donibane aldera egin dute. Ateratzen lehenak Arkoteko arraunlariak izan dira, eta sailkapenaren arabera antolatu dute gaurko erlojupekoa. Dezibelioek gora egin dute Madalen traineruak lehenengo paladak eman dituenean. Animoak, oihuak, pankartak eta banderolak ez dira falta izan etxeko arraunlariei bultzada emateko. Deusto ateratzen azkena izan da, KAE 1-eko liderra baita.
20 minutu pasata ontziak helmugara iristen hasi dira, eta berriro ere, jendea piztu eta helmugara ahalik eta azkarren ailegatzeko animoak ez dira falta izan. Helmugan denbora azkarrena Deustuk markatu du, 19.36.62. Asteburu borobila izan da bilbotarrentzat, tomatera ontziak bitik bi irabazi ditu asteburu honetan. Bizkaitar ugari izan dira estropada gertutik ikusten, Euskolabel ligara igotzeko playoffak oso gertu dituzte.
Deustuarrekin batera, asteburuko beste protagonista Hibaika izan da. Asteburu borobila egin dute oreretarrek. Atzoko estropadan, Hondarribian, zortzigarrenak izan ziren. Sailkapenean hamargarrenak ziren asteburua hasi aurretik, Lapurdirekin berdinduta. Atzo, Lapurditarren arteko aldea handitzea lortu zuten, haiek hamaikagarrenak izan baitziren. Gaurkoan, atzoko maila ona eustea eta hobetzea lortu dute. Beti esan izan dute etxekoak etxean aritzen direnean presiopean aritzen direla. Hibaikak presioa uxatu eta sekulako estropada egin du: bosgarrenak izan dira. Bi estropada hauetan Lapurdiri ateratako aldeari esker, bederatzigarren postuan sendo dira, 64 punturekin. Alegia, playoffera doan hamargarren postua bederatzi puntura dute orain. Zortzigarrena den Hondarribia lau puntura dute.
KAE 1 ligara igotzea lortu zuen Hibaikak iaz, eta denboraldiaren azken txanpan maila onean jarraituta, beste urte batez KAE 1-eko ontzia izaten jarraituko du. Madalen ontziak eskura du denboraldiaren hasieran ezarritako helburua, mailari eustea. Jarraian, gaurko estropadako emaitzak eta HITZAk ateratako argazki-galeria.
XIII. Errenteria Hiria bandera:
- Deusto-Bilbao 19.36.62
- Zarautz 19.48.12
- Zumaia 19.50.88
- San Pedro 20.08.80
- Hibaika 20.16.60
- Kaiku 20.17.92
- Hondarribia B 20.18.08
- Pedreña 20.26.23
- Orio B 20.29.39
- Astillero 20.29.47
- Lapurdi 20.33.12
- Arkote 20.39.26
