Karrikak xanistebanen erreleboa hartuko du
Asteburu honetan, hilaren 14tik 16ra, Karrika auzoko jaiak antolatuko dituzte; aurten ez da idi demarik izango, baina azken urteotan egin ez duten erromeria berreskuratuko dute, 6etzi taldearen eskutik.
Iazko auzotarren arteko herri kirolen desafioa. Allende Arnaiz Garmendia Xanistebanak pasa diren arren, festak ez du etenik Oiartzunen. Astebeteko atsedenaldiaren ondoren, asteburu honetan Karrika jaietan murgilduko da. Ostiraletik, hilak 14, igandera bitarte, publiko guztiarentzako ohiko programazioa antolatu dute. Programazioari eutsi badiote ere, aurtengo festek hainbat aldaketa izango dituzte. Aurten ez da idi demarik izango, hainbat arrazoiengatik. Beste herri batzuetan ere bertan behera utzi behar izan dituzte behiei eragiten dien dermatosis nodularra dela-eta. Hala ere, berritasun bat izango dute: erromeria. Azken urteetan, ez dute ohikoa zen erromeriarik egin; baina, aurten ohitura hura berreskuratuko dute. Larunbat gauean, 6etzi erromeria taldeak auzoa girotuko du, 23:00etan hasita. Oiartzuarrak dagoeneko prest daude jai girorako.
Ostiralean, 19:00etan, txupinazoa egingo dute, eta jarraian, dultzaina taldeak alaituta, kalejira egingo dute Oiartzungo erraldoi txikiekin batera. Gauean, berriz, Truk txapelketa antolatuko dute. Larunbata egun luzea izango da, goizean goizetik auzoan zer egiterik egongo baita. Eguna ondo hasteko, 09:00etan, BTT lagun irteera antolatuko dute. Izena ematea egunean bertan egin beharko dute, 08:15etik aurrera. Goiz eresiarekin batera, 10:00etan ohikoa den Andre Maria Eguneko meza egingo dute. Haurtzaroko ikasleek dantza ikuskizuna eskainiko dute goizean, eta arratsaldean tripak betetzeko aukera izango dute bizilagunek. Etxetik egindako tortillak eta sagardo dastaketarekin jana eta edana bermatua izango dute auzora gerturatzen direnek. Askari bikaina izango dute zain, gauerako indarrak hartzeko.
Festetako jarduera jendetsuena auzo lagunen arteko herri kirolen desafio mundiala izan ohi da. 19:00etatik aurrera, talde bakoitzak bere ahalegin guztiak plazaratuko ditu auzoko onenak izateko helburuarekin. Gastatutakoa errekuperatzeko afariak eskainiko dituzte, bizilagunek plater konbinatuak afaltzeko aukera izango dute larunbatean zein igandean. Gauean, musikak ez du hutsik egingo eta 6etzi taldeak plaza hankaz gora jarriko du.
Igande goizean haurren txanda izango da, jolasen bitartez egunari hasiera emango baitiote. 12:00etan, esku huskako bi partida izango dira. Gazte mailan, Manex Olaizek eta Xabat Olaizek Oier Zabaleta eta Axel Lasaren aurka jokatuko dute; seniorretan, berriz, Oihan Etxeparek eta Aitzol Galardik osatutako bikoteak eta Beñat Ormaetxea eta Unax Oiartzabal izango ditu aurkari. 14:00etan, auzoko bazkaria egingo dute.
Festetako azken orduetan, erraldoiak, zaldi dema eta zezensuzkoa izango dira protagonistak. 19:00etan, zaldi demaren desafioan Haritz Garaiar Mixiyua eta Imanol Fagollagak indarrak neurtuko dituzte. Aurtengo festei amaiera emateko, 22:00etan, Karri-Bingoa egingo dute; eta ondoren, festak agurtzeko zezensuzkoa eta su artifizialak egongo dira. Xanistebanetako erreleboa bermatuta dago, eta Karrikakoak ez dira udako azken festak izango.
