Txikitasunetik tradizioari eusten
Asteburu honetan, Gaintxurizketako Jaiak izango dira; Antxillastegin hiru egunetako egitarau oparoa antolatu dute auzoko bizilagunek.
Gaintxurizketako bizilagunak pozarren dira, urteko hitzordurik garrantzitsuena bueltan dute-eta. Asteburu honetan, ostiraletik igandera bitarte, Gaintxurizketako Jaiak antolatuko dituzte. Aurtengo jaietarako hamabost jarduera inguru antolatu dituzte Antxillastegin, beti ere, tradizioari eutsiz. Esaerak esaten moduan, “ondo funtzionatzen duena zertarako aldatu”. Halaxe egin dute bizilagunek aurten ere, ohiko programazioari eutsi eta herritarrei Gaintxurizketara hurbiltzeko deia zabaldu.
Jarduera guztiek izaera euskalduna izango dute, betiko lez. “Auzoko jai batzordea buru-belarri aritu da adin guztietarako moduko egitaraua osatzen”, adierazi du udalak. Adin guztietarako jarduerak etzi, hilak 14, hasiko dira. 18:00etan txupina zerura bota eta hura lehertzean jaiak hasteko apar festa egingo dute. 19:30ean, haurrentzako toka txapelketa antolatuko dute eta hura amaitzean, bertan afaltzeko aukera izango dute. Afari autogestionatua izango da, alegia, bakoitzak etxetik tripak betetzeko janaria eraman beharko du gauerako indarrak izateko. 22:00etan, ohikoa den metabertsoa egingo dute. Gaintxurizketako bertso txapelketan izena emateko 650 89 02 84 (Iñigo) telefonora deitu beharko dute.
Larunbatean, helduen txanda izango da tokara jolasteko. 11:30ean hasita, nagusien txapelketa antolatuko dute. Lehenengo pikeak izango dituzte bizilagunek, desafiorako berotzeko. 12:30ean, auzotarrak oso adi egongo dira Antxillastegin zer pasako den zain. Auzotarren arteko desafioa egingo dute. 14:00etarako aurreikusi dute herri bazkaria, indarrak hartzeko aukera edukiko dute.
Arratsalderako, haur zein helduen jolasak, merienda eta Lezoko buruhandien desfilea iragarri dituzte. 17:00etan jolasekin hasiera emango diote arratsaldeari, eta afaria heltzeko ordura bitarte zer egina izango da auzoan. 20:30etatik aurrera, bokatak afaltzeko aukera izango dute jaietara bertaratzen direnek. Gauean, 22:30ean, Elustondo anai-arrebek ordu txikiak arte plaza girotuko dute.
Jana eta edana festak amaitzeko
Larunbateko ajea pasatzeko plan hoberik ez dago. 11:00etan, haurren pilota partidak izango dira. Bezperan galdutako indarrak errekuperatzeko patata tortilla txapelketa egingo dute, auzoko baserrien sagardo dastaketarekin batera. Lehiaketan apuntatu nahi duen orok etxean egin beharko du tortilla, eta apuntzeko 12:00ak baino lehen hurbildu beharko dute plazara. 13:30ean, rifen zozketa egingo dute.
Arratsaldean, truk txapelketa antolatuko dute hainbat sarirekin. Bikote bakoitzak 15 euro ordaindu beharko ditu; izen-ematea 16:15ean itxiko da. Lehenengo bi bikoteek afari bikoitza eta bi ardo botila irabaziko dituzte; hirugarrenarentzat, bi oilasko eta bi ardo botila; eta azkenik, laugarren sailkatuak, bi ardo botila eramango ditu. Bestalde, repeskako lehenengo bi bikoteek ere saria edukiko dute: lehenengo bikoteak bi otarrainxka kutxa eta bi ardo botila; eta bigarrenak, bi ardo botila. 19:00etan, Orratx! antzerki taldeak Jaietako hirugarren eguna emanaldiarekin aurtengo festei amaiera emango die.
