Alvaro Ledesma artista errenteriarra hil da
"Arrasto handia" utzi duela aipatu diote HITZAri haren gertukoek: "artista errepikaezina zen, oso abila, sentsibilitate handikoa".
Ledesma Migrantea bere eskulturaren parean, larunbatean inauguratu aurretik. Alvaro Ledesma artista errenteriarra zendu berri da, 51 urte zituela. BERRIAk eman du haren heriotzaren berri. Artearen hainbat alorretan ezaguna zen Ledesma, herrian eta herritik kanpo arrasto handia utzitakoa. Arrasto horren adibide garbi eta ederrenetako bat Agirre Lehendakariaren plazan jada klasiko bilakatu den migratzaile eta errefuxiatuei keinu egiten dion eskultura da, Ledesmak mimo eta harrotasun handiz landutakoa.
“Harrotasun” hitz hori errepikatu zuen behin baino gehiagotan 2018an HITZAri eskainitako elkarrizketan, migrazioaren gaia oso gertutik bizitu baitzuen Ledesmak. Haren gurasoak migratzaile gisa heldu ziren herrira, etorkizun oparoago baten bila. “Moduren batean nire herrian nire lan bat izateak asko suposatzen du niretzako. Lan honek pertsonalki ukitu nau. Harrotasuna sentitzen dut”, esan zion hedabideari orduko hartan.
Hark utzitako arrastoa “harro egoteko modukoa” dela aipatu dio HITZAri haren lagun eta lankide izan den Oier Guillanek. “Artista bezala gauza oso ezohikoa izan da Alvaro, jorratu dituelako arte oso diziplina anitzak eta guztietan erakutsi duelako gaitasuna eta sentsibiltatea. Egun hauetan ikusi da lagunez inguratuta zegoela, maila pertsonalean zein artistikoan. Oso estimatua eta maitaua izan den pertsona bat da. Bere lana askotan ikusezina izan da, eta ez da nahikoa errekonozitua izan. Horrelako oso figura gutxi daude euskal kulturan. Artearen ikuspegitik begirada propio bat ekarri zuen. Teknika ezberdinak kontrolatzeko gaitasuna zuen eta gero guzti hori transmititzeko. Izugarri kreatiboa zen, oso fina lanean. Errepikaezina zen. Arrasto handia utzi du pertsona bezala eta artista bezala”. Guillanek gogorarazi du Mikelazulon eman zituela bere lehen pausoetako batzuk eta Metrokoadroka kolektiboko kide eta bidelagun ere izan dela.
Artista polifazetikoa
Eskultore lanetan aritu zen bereziki, baina adar asko ukitu zituen: argazkilaria, margolaria, musikagilea, bideogilea eta idazlea ere izan zen.”Diziplina guztietan ibilbide handia egin zuen, oso fina zen denetan. Modu autodidaktan batean egiten zuen dena gainera. Jende askok izan dugu harekin kolaboratzeko pribilegioa. Hain abila ematen zuen lanerako, segurtasuna ematen zuela. Errementari zen ofizioz, eta haren tailerrean sartzerakoan artearen eta egunerokoaren arteko nahasketa bat ikusten zenuen, ederra”, gogoratu du Guillanek.
Errementari zela hasi zen eskulturaren munduan murgiltzen 2000. urte inguruan. 2007an margotzeari ekin zion, baita bideoak sortzeari ere. Pianoa eta biolina jotzen hasi zen orduan. Kontzertuak ere eman zituen Ledesmak, eta emanaldietarako eszenografia lanak ere egin zituen. 2021an argazkilaritzari esker “bere burua berrasmatu” zuela aipatu du BERRIak.
