Telletxea anaien omenez, topa egingo dute Gaztañon
2025 eta 2026an zendutako Gorka eta Jon Telletxearen omenezko artisau garagardo azoka egingo dute irailaren 12an Gaztañon. Egun osoko ospakizuna izango dela iragarri dute.
Datorren irailaren 12a egun berezia izango da Gaztaño auzoko herritarrentzako. Artisau garagardo azoka berezia egingo dute, 2024an eta 2025an zendutako Telletxea anaien omenez. Egun osoko festa antolatzen ari dira auzotarrak, “maitasunez”, HITZAri jakinarazi diotenez.
2025eko irailaren 13a eta 2026eko martxoaren 2a gogoratu dituzte antolatzaileek, egun latzak izan baitziren horiek auzoan. “Telletxeatar anai gazteenak, Jonek, askotan esaten zuen Gaztañon Maritxu Mozkor jai txikiak antolatu beharko liratekeela; zure erronkari heldu diogu, Jon, eta bide batez, Gorkak ikusi nahi izango zukeen artisau garagatdoen azoka ekarri dugu auzora. Zuengatik, topa”.
Gorka eta Jon Telletxea oso presente izango dira iraileko azoka honetan. “Bi anaiak izar artean egongo dira garagardo pitxer bana eskuetan, eta haien omenez guk ere topa egin nahiko genuke auzoan, telletxeatar anaiek hain gogoko zuten artisau garagardoarekin”.
Auzoko jai batzordeak egun osoko festa antolatzea erabaki du. Inguruko garagardogileak ere festara batu dira (Versum, Zampano, Brewery Land, Bidassoa, Kaneta eta Otsaihen-en zukuak dastatu ahal izango dira), eta auzotarrak jada buru-belarri ari dira. Azoka eta kontzertuez gain, herri bazkaria ere izango dela iragarri dute. Irailaren 7a izango da horiek erosteko azken eguna. Arkaitza, Reyna eta Leku Zaharran izango dira eskuragarri. Beheko koadroan egitarau osoa ikus daiteke.
Egitaraua:
- 12:00: Garagrdi Festaren hasiera
- 12:30: Trikitilariak.
- 14:00: Bazkaria.
- 16:30: Benetan musika taldearen kontzertua.
- 19:00: Peppermint Sextet taldearen kontzertua. Jarraian, pintxoak eta bokatak eskuratu ahal izango dira.
- 22:00: Zozketa egingo dute eta bideo bat proiektatuko dute.
- 22:30: Ximaur taldearen kontzertua.
- 00:00: Bukaera.
