Gaintxurizketako jaiek, txikitik gutxi
Aurtengo auzoko jaien gaineko balorazio "oso-oso positiboa" egin dute auzotarrek. Hiru egunez festa eta giro ona izan da nagusi.
150dik gora lagun bildu dira aurtengo herri bazkarian. Asteburu mugitu eta oso berezia izan dute Gaintxurizketan. Auzoko jaiak ospatu dituzte, eta auzo txikia bada ere, txikitik gutxi duela erakutsi dute festek eta auzotarrek aurten ere.
Aurtengoak hiru eguneko jaiak izan dira, egun bat luzatzea erabaki baitute auzotarrek. Eta asmatu dute. Hiru egunak “handiak” izan direla ondoriztatu dutelako. “Balorazioa oso-oso positiboa da. Hirugarren egun bat luzatzea erabaki dugu eta erantzuna oso ona izan da”, aipatu dio HITZAri Haizea Etxeberria auzotarrak. Urtez urte handitzen doazen festak direla aipatu du, pozik eta harro. “Dena primeran joan da”.
Egitarauaren barruko jarduera eta ekintza guztiek jasotako harrerarekin oso pozik dira auzotarrak: “19 tortilla aurkeztu ziren lehiaketara, izugarri asko!”, aipatu du, pozik. Larunbateko bazkarian 150 lagundik gora bildu ziren, esaterako. “Eta jende askok aipatu du, aurten lehenengoz antolatu dugun baserriko ginakana ere asko eskertu dutela, asko gozatu dutela”.
Sari festa
HITZAk, beste urte batez, jaietako errifen irabazleen berri emateko pribilegioa izan du. Hona, jatetxe bakoitzean otordu bat jasoko duten zenbakiak:
- Irurtzun: 413
- Patxiku Enea: 1757
- Iriarte enea: 4529
- Sagar Zulo: 2991
Hona auzotarrek HITZAri bidalitako argazki batzuk:
