"10 urte AHTren obrengatik tren zerbitzu txar bat jasaten"
AHTren obrengatik aldiriko tren zerbitzua erabat etetea erabaki du uda honetan ere ADIFek. Honek "galera handiak" eragiten dituela salatu du Oarsoaldeko AHTren Aurkako Taldeak.
Abiadura Handiko Trenaren (AHT) lanek, besteak beste, aldiriko tren zerbitzua erabat etetea eragin dute uda honetan ere. ADIFen mozketa honek herritarren egunerokoan galera “handiak” eragiten dituela salatu du beste behin Oarsoaldeko AHTren Aurkako Taldeak. Ohar bidez salatu dutenez, etenaldi hori ordezkatzeko jarri duten autobus zerbitzuak “ez ditu inolaz ere trenari dagozkion ordutegiak betetzen”. Errepidez egindako bidaia horiek “luzeagoak” direla salatu dute.
Esaterako, Loilola eta Martuteneko geltokiak “kanpo” geratzen direla deitoratu dute, eta Hernanitik aurrera trenez joan ahal izateko ez dela ziurtatzen “berehalako jarraipena”. “Askotan trenak alde egin du autobusa iritsi aurretik, hurrengo trenari itxaroten egotea beste aukerarik uzten ez digutelarik, ordubeteko itxaronaldia ere izan daitekeena”. Inork ez duela ez azalpenik ematen, ezta ardurarik hartzen salatu dute.
Herritarrek AHTren obrengatik “tren zerbitzu txar bat jasatzen 10 urte” pasatu dituztela diote. “Trenen maiztasuna obrak hasi aurretik zegoenaren heren batera murriztu zuten, atzerapenak, bertan behera geratzeak, matxurak edo orain bezala erabateko mozketak eragiten”.
Bidaiari asko “errepidera bota” dituztela diote, eta denen ahotan dagoela “Renfe ez dela fidatzekoa”. Jaurlaritzak eskumena hartzeak ez duela ezer aldatu diote. “Zein aurrerapen ekarri digu 10 urtetan galduarazi diguten denborarekin alderatuz, xahuketa eta txikizioa besterik ez dakarren makroazpiegitura honek? Bakar batzuen neurrira eta poltsiko batzuek betetzeko xedearen egina dagoela ziurtatzen gaitu”.
Bukatzeko, “eredu zaharkitu hau behin betiko” baztertzeko beharra nabarmendu du taldeak.
