TAOren arauketa aldatuko dute herriko bi eremutan
Iztieta-Ondartxo-Altzate 2. gunean eta Miguel Irastorza plazan izango dute eragina aldaketek. Irailaren 1ean sartuko dira indarrean.
Miguel Irastorza plazako aparkalekuak. Datorren asteartetik (irailak 1) aurrera, bi aldaketa izango dira TAOren arauketan. Errenteriako Udalak uztailean onartutako dekretu baten ondorioz, bi eremuri eragingo die, hain zuzen, aldaketa honek: Iztieta-Ondartxo-Altzateko 2. guneari eta Miguel Irastorzako (Don Vito izenez ere ezaguna) 44 aparkalekuen erabilerari.
Asteartetik aurrera TAO 2 eremuak Iztieta, Ondartxo eta Altzateri dagokienak, bere erregulazio ordutegia luzatuko du, asteleheneko 00:00etatik larunbateko 14:00etara etenik gabe martxan izango da. Igande eta jai egunetan, berriz, ez da TAOrik izango.
Aldaketa honekin “aparkalekuak luzaroan okupatzea” saihestu nahi du udalak, “ibilgailuen txandaketa erraztu eta inguruan bizi diren bizilagunek aparkatzeari lehentasuna eman, auzo horietan espazio publikoa eta mugikortasuna hobeto kudeatuz”.
Bestetik, Miguel Irastorzan 44 plaza TAO izatera pasako dira asteartetik. Orain arte gauez eta TAOrik gabe erabili diren horiek TAOren 6 eremura pasatuko dira, Iztieta-Ondartxo-Altzaterako proposatutako erregulazio berberarekin: asteleheneko 00:00etatik larunbateko 14:00etara etenik gabe martxan izango da eta igande eta jai egunetan, berriz, ez da TAOrik izango.
Gune honetan udalerriko edozein TAO gunetako ibilgailu baimenduek ahalko dute aparkatu, landa eremukoak barne, orain arte Beraun kalearen hasieran dagoen aparkalekuan egin den bezala. Gainera, dekretuan adierazitako Miguel Irastorza inguruko atarietako bizilagunek 6. eremuko txartela eskatu ahal izango dute bertan aparkatzeko. Honako hauek eskatu ahal izango dute: Miguel Zabaletako 8, 10, 12, 14, 15, 16, 17, 18, 19, 20, 21, 22, 23, 24, 25, 26, 27, 28, 31, 33 et a35 zenbakietakoek; eta Galtzaraborda etorbideko 2, 4, 4B, 6, 8, 10, 11, 13, 17, 19, 21, 23, 30, 32 etae 34 zenbakietakoek.
Aldaketa hauek irailaren 1ean jarriko dira indarrean, seinaleak egokitzeko lanak bukatu eta informazioa erabiltzaileei helarazi ondoren. Behin martxan jartzerakoan, aldaketen eraginkortasuna baloratuko du udalak.
