"Herriaren zatitxo bat dira jada"
Atzo arratsaldean itzuli ziren euren herrialdera uda gurean pasatu duten haur sahararrak. "Agur" baino, "hurrengo urtera arte" esateko eguna izan zen atzokoa.
Atzokoa tristuraz baina baita itxaropenez betetako eguna izan zen Donibanen. Oporrak Bakean programari esker gurean uda baketsu eta lasaia pasatu duten haur saharrarrei “agur” baino, “hurrengo urtera arte” esateko eguna izan zen atzokoa. Bixi-Bixi elkartean bildu ziren Oarsoaldeko familiekin uda elkarbanatu duten zazpi haur sahararrak. Bertan izan zen HITZA.
Elkarteko kide Ixiar Goienetxeak azaldu du uda ederra pasatu dutela haurrek eta familiek: “Zorte onez uda oso-oso lasaia izan dugu, ederra. Haur guztiak oso ongi integatu dira, herriaren zatitxo bat dira jada. Aurreko eguneko festan hori sumatu genuen, plaza beteta zegoen. Euren familiak ikusteko irrikaz dira, baina askok diote laster itzuli nahi dutela”.
Bixi-Bixi elkartearen bidez zazpi haur izan dira gurean aurten, eta El Watan-en bidez, hiru. “Iaz baino hiru haur gehiago izan ditugu aurten”.
Atzokoa “tristuraz betetako” eguna izan zela aitortu du Goienetxeak, baina pozik dio “pilak kargatuta eta osasun aldetik ongi” doazela denak euren herrialdera. “Beraiek esaten digute negar ez egiteko, gogorra egiten da. Zorionez nahiko osasuntsu daude denak, ongi jan dute. Eta itsasoa, igerilekua, hori da eramaten dutena. Parrandatxoak ere izugarri gustatzen zaizkie. Han ez baitute halakorik. Asko gozatu dute, eta dugu”.
Hondarribiko aireportutik itzuli bezain laster, hurrengo urteko Oporrak Bakean programan pentsatzen jarri dira Donibane eta Oiartzungo elkarteak. Orain balorazioa egiteko unea helduko da, eta urriaren bukeran Estatu mailako jardunaldi batzuetan parte hartuko dute Bixi-Bixi eta El Watan-ek. Parte hartzera animatu ditu herritarrak Goienetxeak: “Guk asko ematen diegu, baina beraiek guri izugarri ematen digute ere. Eta irakasten digute xumetasun horretatik. Laguntza behar dute beroaldi eta egoera horretatik ihes egiteko. Pentsa, oraintxe bertan 53 gradutan daude han”.
