70 kultur jarduera urtea bukatzeko
Irailetik abendura bitartean, 70 jarduera baino gehiago programatu ditu udalak lau barrutietan.
Pasaiako Udalak prest du urteko azken lauhilekoko kultur agenda. Ohi bezala, udalak liburuxka bat sortu du, eta udalerriko etxe guztietan banatu du Pasaian egingo diren jarduera garrantzitsuenen berri emateko. Irailetik abendura bitartean, 70 jarduera baino gehiago egingo dira lau barrutietan, eta honakoak goratu ditu udal erakundeak: Gau Beltza, Euskararen Eguna, Parketarrak, PUAJ, 12CM edo Eguberrietako programa.
Iraileko lehen jarduera 11n izango da. Bokaleko Gazte Elkargoak Jone, batzuetan filma proiektatuko du Antxon. Horrez gain, irailean arrazismoaren kontrako formakuntza saioak egingo dira, eta Parketarrak egitasmoa itzuliko da, pasaitar gazteek euskaraz jolasteko eta parkeak bere egiteko.
Urriaren 3an Zinema Txikiaren lehen saioa egingo da Donibaneko Juanba Berasategi aretoan: Tafiti eta bere lagunak filma proiektatuko dute. Bokalek IV. topaketa egingo du San Pedron, urriaren 12an. Urriaren 16tik 25era Pasaiako Umorezko Antzerki Jardunaldien (PUAJ) 45. edizioa egingo da, sei emanaldirekin. Hilabetea bukatzeko, urriaren 31n emakumeen pilota partidak jokatuko dira Antxoko Ibaiondo frontoian, eta Gau Beltza ere egingo da lau barrutietan.
Azaroaren 8an Kontu Kantari zikloa itzuliko da. Lehen saioan Oskarbi taldea izango da Antxoko elizan. Azaroaren 13tik 21era Ikuska film laburren XXVIII. edizioa egingo da Trintxerpeko alkateordetzan.
Urtea agurtzeko, abenduan Euskararen Eguneko edota Eguberrietako ekitaldiak antolatuko dira Pasaian. Horiez gain, CIMASUBen eskutik itsaspeko zinema saioak itzuliko dira Pasaiara, eta 12CM erakusketak San Pedroko udal aretoa artelan txikiz beteko du. Eguberrien programazioaren barruan, abenduaren 26an Ines Osinagak eta Ahizpak taldeak kontzertua egingo dute Donibanen.
Sarrerak
Jarduera guztien zerrenda, sarreren salmenta eta xehetasun guztiak udal webguneko Agenda atalean eta sare sozialetan kontsulta daitezke. Ordutegiak edo azken orduko aldaketak ere plataforma horietan argitaratuko dira.
