Espero ez zen sufrimendua
Larri, baina mailari eutsi dio 'Erreka' traineruak. Abuztu txarra egin ondoren, atzo final antzekoa izan zuten arrosek.
'Erreka' trainerua, atzo, estropada bukatu berritan.Bermeo Arraun Argazkiak Atzoko (hilak 30, igandea) Aresko estropada bukatuta lasaitu ederra hartu zuten Erreka traineruko kirolariek. Ares atzean utzi, eta txanda irabazi zuten arrosek. Final antzekoa izan zen atzokoa; Ares aurretik izan balute sanjuandarrek, eta bien artean bi traineru izan balira, Eusko Label Ligari eusteko play-offean legoke Joseba Fernandezek entrenatutako trainerua. Baina ez zen hala izan: txanda irabazi eta sailkapen nagusian zazpigarren izan ondoren (abuztuko emaitza onena), 2027an ere arraunaren mailarik gorenean izango da Erreka. Asteburuko eta atzoko emaitzak, nahiz sailkapen nagusia hemendik kontsulta daiteke.
Arrosek ez uzten espero hala iristea ligaren bukaerara. Uztail dezentekoa eginda, sailkapen nagusiaren bigarren zatian bai, baina puntuei begira lasai asko ziren. Hirugarren era bigarren txanda artean ziren. Baina abuztuan egindako hamar estropadetako erdietan azkenak izan dira Erreka-koak, eta beste bitan hamargarren. Emaitza txar horiek, eta Aresen susperraldiak, egoera kritikoan utzi zuten arrosen gizonen traineruaren proiektua. Zarauzko bigarren estropadan (hilaren 23an) zortzigarren izan zirelako, eta atzo zazpigarren, play-offa saihestu dute. Atzoko 12:35ak aldera arnasa hartu zuten; Kontxa irabazi balute bezala ospatu zuten arraunlariek eta zaleek zazpigarren postua, Ares atzean utzita.
Liga bukatu dute arrosek. Orain, Kontxako sailkapen estropadan izango dira asteazkenean; emakumeena ostegunean da. Sari erantsia litzateke bi traineruentzat munduko traineru estropada garrantzitsuenean izatea.
