181 hilarrietan egindako lapurreten ustezko egilea, identifikatuta eta inputatuta
Agerraldia egin du gaur Aizpea Otaegi alkateak Zentolen Berri hilerrian. Udalaren izenean elkartasuna adierazi die lapurretaren eta kalteen biktima izan diren familia guztiei, horrelako ekintzak "zitaltzat" eta "mespretxagarritzat" jota.
Agerraldia egin du Aizpea Otaegi alkateak gaur Zentolen Berrin. Zentolen hilerriko 181 hilarrietan lapurreta eta kalteak eragin dituen ustezko egilea identifikatu eta inputatu egin dute. Hala jakinarazi du Aizpea Otaegi alkateak, gaur Zentolen Berri hilerrian bertan egindako agerraldian: “Hilerriko langileen, Udaltzaingoaren eta Ertzaintzaren lanari esker izan da posible ustezko egilearen identifikazioa eta ondorengo inputazioa”.
Bernar Lemos Segurtasun zinegotziarekin, Udaltzaingoaren bi ordezkari eta Zentolen Berriko arduradunarekin batera egin du agerraldia Otaegik, eta lehenik eta behin, elkartasuna adierazi die udalaren izenean lapurretaren eta kalteen biktima izan diren familia guztiei, “horrelako ekintzak erabat zitalak eta mespretxagarriak dira”.
Abuztuaren 1etik 2rako goizaldean izan ziren gertaerak, hala kontatu du Otegik: “Lapur bat sartu zen Zentolen hilerrira eta 181 hilarri profanatuak izan ziren”. Gaurko berria, ustezko egilearen identifikazioa eta inputazioa direla jarri du nabarmen udal agintariak, “uste dugu berri pozgarria dela”. Edozein lapurreta salagarria dela esanda, hilerri batean salagarriagoa dela gaineratu du Otaegik, “eragindakoentzako leku sakratua delako eta zentzu horretan gure babes eta elkartasun osoa adierazi nahi diegu familiei. Adierazi nahi diegu, halaber, hilerriko arduradunak lan indibidualizatua egingo dutela, familia guztiei banaka deituko dietela, eta gaurtik aurrera, datozen asteetan, hondatutako elementu guztiak berriro jarriko direla”.
Gertaerak eragindako minarekin “arduratuta” azaldu da, “mingarria da era honetako ekintza bat eta gure aldetik gure eskuetan dagoen guztia egingo dugu lehenbailehen egoera bere onera itzul dadin”.
Salaketak biltzen
Lapurreta eta kalteak jasan dituztenak salaketak aurkezten hasiak dira, Udaltzaingoak eman ditu datu zehatzak eta azaldu une honetan 21 familiek aurkeztu dituztela. Hori horrela, oraindik ere jarri ez dutenei salaketa egiteko deia Otaegik, “horretarako udaltzaingora jo dezakete. Espediente bakarrean salaketa guztiak biltzeko aukera izango da horrela, Udaltzaingoak, Ertzaintzak eta hilerriko arduradunek jasotako informazio guztiarekin osatuta epailearen eskura jartzeko”.
Lapurreta eta kalteek eragindako kostu ekonomikoa ez dutela aztertu oraindik azaldu du Otaegik kazetarien galderei erantzuteko, eta puntu horretan nabarmen jarri du udal agintariak, lapurtutakoek oso balio exkaxa dutela, “nabarmendu beharreko kontu bat da eta min handiagoa eragin kaltetuei, lapurtutakoak balio sentimental handia eta balio ekonomiko txikia duelako”. Puntu horretan arreta jarri du hilerriko arduradunak azaltzeko lapurtutako elementuak brontzezkoak direla, “ez kobrezkoak, ezta urrezkoak ere, eta apenas dute baliorik merkatuan”.
Gertaeren harira Udaltzaingoak jakinarazi du arratsalde eta gauez zaintza lanak egiten ari dela hilerri inguruan bart hasita.
Ondoko argazkiak Zentolen hilerrian eginak dira gaur, bertan hilarri batzuetan egindako kalteak ikus daitezke; gehienetan gurutzeak lapurtu dituzte.
-
- Hilarrietan lapurreta eta kalteak eragin dituzte Zentolenen.
-
- Hilarrietan lapurreta eta kalteak eragin dituzte Zentolenen.
-
- Hilarrietan lapurreta eta kalteak eragin dituzte Zentolenen.
