Larunbatean, hitzordu bikoitza Materrekin
12:00etan Jaizkibelgo itsaslabarrak ezagutzeko itsas zeharkaldia egingo dute, eta 16:00etan artisau antxoa kontserbak egiteko tailerra.
Materrek indartsu hasiko du iraila, larunbaterako (hilak 5) hitzordu bikoitza proposatu baitu. 12:00etan Jaizkibelgo itsaslabarrak ezagutzeko aukera egongo da, Mater ontzian nabigatuz. Parte hartzaileek Jaizkibelgo paisaiak topatuko dituzte, eta kulturan, naturan eta itsas tradizioan murgilduko dira. Bukatzeko, hegaluze pintxo batez gozatuko dute (aukera beganoa ere egongo da). Itsas zeharkaldiak 45 euroko kostua du.
Ondoren, 16:00etan, artisau antxoa kontserbak egiteko tailer bat egingo da Mater ontzian. Ikastaroan kontserben historia, jatorria eta teknikak irakatsiko dituzte, parte hartzaileek nahi adina kontserba egin ditzaten. Kontserbak egiteko beharrezko xehetasun guztiak ere ezagutaraziko dituzte, gazitze prozesutik garbiketa lan zehatzaren ondoren ontzietan sartu eta etxean dastatzeko aperitibo bihurtu arte. Tailerrean kontserba propioa egin ahal izango dute parte hartzaileek, etxera eraman eta bertan dastatzeko. Ikastaroak 15 euroko kostua du.
Jardueran parte hartzeko, beharrezkoa da aurrez izena ematea 619 81 42 25 telefonora deituta, posta elektronikora mezua bidalita edo Materren webgunea baliatuta.
