Azkueneko kirol pistak belar artifizial berria izango du
Udalak Trintxerpeko pistako belar artifiziala aldatzeko lanak abiatu ditu gaur. Jarduketen helburua da instalazioaren egoera hobetzea eta herritarrek kirolerako erabiltzen duten espazioaren kalitatea eta erabilgarritasuna handitzea.
Pasaiako Udalak Trintxerpeko Azkueneko kirol pistan belar artifiziala berritzeko lanak abiatu ditu gaur. Jarduketen helburua da instalazioaren egoera hobetzea eta herritarrek kirolerako erabiltzen duten espazioaren kalitatea eta erabilgarritasuna handitzea.
Lanek 33.993,38 euroko aurrekontua dute, BEZa barne, eta hainbat jarduketa egingo dituzte. Lehen fasean egungo belar artifiziala kendu eta instalaziotik aterako da, homologatutako zentro batean birziklatzeko. Hilaren 7ko astean belar berriaren instalazioarekin hastea aurreikusi du udalak.
Belar berria 12 milimetroko altuerako kirol erabilerarako belar artifiziala izango da, hainbat kirol jardueretarako egokitua. Instalazioak junturen arteko lotura sistema berria izango du, eta dilatazio juntak hobetu egingo dira. Putzuak sortzen diren eremuetan lurra nibelatzeko lanak egingo dituzte, ur pilaketak saihesten laguntzeko eta pistaren egoera orokorra hobetzeko.
Horiez gain, silize harea instalazioaren azalera osoan zabalduko da, eta areto futbolean aritzeko neurri homologatuetako marra zuriak margotuko dituzte. Silize hareak ingurumen inpaktu txikiagoa du, bereziki pneumatikoetatik datozen granulatuek eragin ditzaketen kutsadura kimikoarekin eta mikroplastikoen askapenarekin alderatuta.
Azkueneko jarduketa udala azken urteotan herriko espazio publikoak eta kirol instalazioak hobetzeko garatzen ari den estrategiaren barruan kokatzen da. Jarduketa horien xedea da “herritarrek egunerokoan erabiltzen dituzten espazioak zaindu, egokitu eta hobetzea, Pasaia gero eta bizigarriagoa eta jasangarriagoa izan dadin”.
Bide horretan, udal erakundeak hainbat hobekuntza egin ditu udal kirol instalazioetan eta horietako materialetan, “instalazioen segurtasuna hobetzeko, herritarren kirol praktika sustatzeko eta espazio horien erabilera baldintza hobeetan garatu ahal izateko”.
