Kontxarako txartel bana nahi dute Hibaikak, San Juanek eta Hondarribiak
Hemeretzi traineru ariko dira lehian gaur 18:00etan hasita, tartean, Hibaika, San Juan eta Hondarribia. Datozen bi igandetan arraunaren Olinpiada den Kontxan aritzeko txartela lortu nahi dute hirurek.
Zaleak atzoko gizonen sailkapen estropadan arrapalan. gaur ere jendetza bilduko da Donostiako Portu aldera.Mikel del Val Garcia Kontxako badian erabakiko da gaur arratsaldean emakumeen zein traineru ariko diren 6an eta 13an Kontxako Bandera eramateko lehian. Atzo gizonen txanda izan zen, eta gaur emakumeak ariko dira nor baino nor Kontxarako txartel baten bila. Aurten hemeretzi talde, iaz baino bi gutxiago, eta zazpi plaza jabe bila, Arraun Lagunak-ek ez baitu lehiatu beharko plaza lortu baitu jada.
Ontzi horien guztien artean, Oarsoaldeko bi: Hibaika eta San Juan. Arraroa litzateke arrosek eta beltzek txartela ez lortzea, pronostiko guztiek bi eskifaia horiek Kontxa barruan kokatzen baitituzte. Batelerak hirugarren izan dira Euskotren Ligan; Hibaikakoak, seigarren. Bidasoko bat: Hondarribia. Liga bat beherago aritu da Ama Guadalupekoa aurten, ETE Ligan, baina hortzak erakutsi eta lan bikaina egin du taldeak, baita lidergoa lortu ere liga irabazita, Zarautz gertu-gertuan izan badu ere.
Agertoki ideala, Oarsoaldeko bi ontziak eta Hondarribia Kontxa barruan izatea. Madalen ontzikoek lortuz gero, hamalaugarren urtea izango dute Kontxa lehiatzen; ez da marka makala. Batelerek berriz, iazko arantza kentzeko aukera izango lukete, ez baitziren sailkatu Kontxarako aurreko urtean. Hondarribiak lortu zuen txartela, eta aurten berriro lortzea denboraldia biribil bukatzeko osagai ederra litzateke.
Bi taldeetan banatuta ariko dira hemeretzi ontziak erlojupeko proban, eta A taldea izango da lehiatzen lehena. Badian estroboa hartzen lehen eskifaia Errenteria-Oreretakoa, Madalen ontzia izango da irteten lehena; seigarren postuan aterako da Hondarribia, eta seigarren lekuan San Juan.
Zehazki, ondoko traineruak ariko dira A taldean: Hibaika, Hondarribia, San Juan, Astillero, Donostiarra, Perillo, Orio, Tolosaldea, Zarautz eta Zumaia.
B taldean, berriz: Castropol, Deustu, Esteirana, Chapela, Kaiku, Lekittarra, Ondarroa, Tiran eta Amegrove.
Irteera hurrenkera osoa beheko koadroan kontsulta daiteke.
Oarso Bidasoko hiru ontziek txartela lortuko duten jakiteko, arratsaldera arte itxaron beharko da, baina ziurra dena zera da, borrokatu borrokatuko direla.
Kontxako emakumeen sailkapen estropadaren irteera hurrenkera
Lehenengo hamarrak A taldekoak dira, 11.etik aurrera B taldekoak
- Hibaika
- Donostiarra
- Perillo
- Astillero
- Zumaia
- Hondarribia
- Orio
- San Juan
- Tolosaldea
- Zarautz
- Esteirana
- Chapela
- Ondarroa
- Tiran
- Lekittarra
- Kaiku
- Amegrove
