LiteraturA/Z programa ekintzez josita dator
Herritarrak literatura, kultura eta ezagutzara gerturatzea du xede udal bibliotekak programaren bidez.
Jarduera sorta antolartu du bibliotekak aurten ere. Ekintza proposamen zabala Lekuonako Udal bibliotekak ondu duena ikasturte berrirako. LiteraturA/Z programaren aterkipean urritik aurrera ekintza sorta askotarikoa jarriko du martxan, eta horietan parte hartzeko izen ematea, berriz, hilaren 7an, astelehenarekin zabalduko du.
Literatura solasaldiak klasiko bat dira eskaintza horren barruan, errotuta daude eta hasi berria den ikasturtean ere ez dute hutsik egingo, horiekin batera baina, hainbat berrikuntza dakartzala programak azaldu dute arduradunek: “Aldakoenea bibliotekako eskaintza indartu da Liburu Baby klubaren bigarren saio bat, Liburu Txiki kluba, Txikientzako ipuin kontaketa eta helduentzat Tertulia Literarioa martxan jarrita; Lagunen Artean Ehuntzen tailerra ere izango da Aldakoenean”. Horiek Aldakoenean egindako berrikuntzak, baina Lekuona Fabrikako bibliotekak ere badu berrikuntzarik, “poesia tailerra bi taldeetan banatu da hasiberriak eta arituak bereiziz, eta iaz hasitako Komiki Klubak, Testu Feministen Irakurketa taldeak eta Narrazio Laburren Idazketa tailerrak ere jarraipena izango dute”.
Eskaintzaren oinarrian, “aniztasuna” jarri dute programaren arduradunek. Hala, nabarmen jarri dute adin guztietarako ekintzak izango direla, jaiotzetik 60 urtetik gorakoentzat, euskaraz, gaztelaniaz eta ingelesez, pertsona bakoitzak bere gustuko jarduera aurki dezan. Denera 24 jarduera bildu dituzte programaziora hainbat elkarte, dinamizatzaile eta ipuin kontalariren laguntzaz.
Izen emateak, astelehenetik
Astelehenean, hilaren 7an, zabalduko dute programara bildutako jardueretan izena emateko epea eta hilaren 20ra arte izango da aukera; online (klik hemen) edo Lekuona Fabrikan zein aldakoenean aurrez aurre, edota 943 44 96 35 telefono zenbakira deituta egin daiteke. Parte hartzeko beharrezkoa da liburutegi txartelaren jabe izatea. Plazen esleipena, berriz, zozketa bidez egingo dute eskaera plaza kopurua baino handiagoa denean, eta hilaren 25ean argitaratuko dira onartuen zerrendak. Informazio gehiagorako klik hemen.
