Urriaren 17an, Antxoko II. Kinto Jaia
50 urtetik gorako kinto guztiek festa bateratu erraldoia egingo dute Antxon. Milaka herrikide espero dira kintada orokorraren bigarren ekitaldian.
2022ko kintada handian, belaunaldi bateko kideak Puro Relajoren kontzertuan. 50 urtetik gora dituzten kinto antxotarrek festa erraldoia egingo dute bigarrenez barrutian. Urriaren 17rako jarri dute ehunka eta ehunka herrikide batzea aurreikusi den festa. 2022ko urriaren 22an egin zen lehen kintoen festa bateratua, eta horrek izandako arrakasta eta harrabotsa ikusita, lau urte geroago esperientzia sozial eta festazalea errepikatzea erabaki dute jardueraren sustatzaileek.
Jada ongi asko mamitua da festa: kintoen batzar orokorrak egin dira, eta horren paraleloan belaunaldi guztietako kideak euren kabuz antolatzen ari dira belaunaldi bakoitzeko kideak batu, eta egunean egin beharrekoak adosteko.
Kintada erraldoiaren mamia belaunaldi guztien bazkariak badira ere (adin talde bakoitzeko kideek elkarrekin bazkaltzen dute, baina izango dira bazkari-guneak hainbat belaunaldiko kideek batera bazkalduko dutenak), bazkari horien aurretik eta ondoren izango da zer egin, egun osoko festa eguna antolatu baitute elkarlanean. Antxon jada suma daiteke egunari begirako zirrara, barrutian edo bertatik kanpo bizi diren antxotar asko eta asko mobilizatuko baitira gogoratzeko eguna izateko traza duen hitzordurako.
Bazkariak 14:30ean izango dira, barrutiko hainbat tokitan. Aurretik, 12:00etan, txupinazoa izango da, eta ondoren kinta guztietako kideek haiek adostutako tokietan luntxa egingo dute. Bazkalosterako, berriz, Joselu Anayak taldearekin erromeria iragarri dute (17:30). Egunean zehar izango dira beste hainbat jarduera, baina horien berri aurrerago emango dute antolatzaileek.
