OTXEko lau txirrindulari mendiko txirrindulari onenen artean
Eneko Olveira, Lucia Miralles, Cynthia Martin eta Roger Turne lasterketa bikaina egin dute Val di Solen jokatutako Munduko Txapelketan.
Ametsak betetzeko dira, eta halaxe egin dute Oarsoaldeko Txirrindularitza Eskolako (OTXE) lau txirrindularik, JRG Norclamp Coloma Academy taldearekin. Mendiko txirrindularitzako Munduko Txapelketa jokatu dute Italian, Val di Solen. Abuztuaren 26tik 30era bitarte, maila goreneko lasteketak izan dira, mendian gora eta behera. 23 urtez azpikoetan OTXEk presentzia handia izan du, bertan taldeko lau txirrindulari izan baitira: Eneko Olveira, Lucia Miralles, Cynthia Martin eta Roger Turne. Lauek lasterketa bikaina osatu dute, eta klubak “hitzik gabe” dago txirrindulari hauek lortutakoarekin.
OTXE txirrindularien haztegia bihurtu da azken urteotan, eta taldetik maila handiko txirrindulari ugari atera dira. Horren eredu da aurreko astean Italian izandako txirrindulariek erakutsitako maila. “OTXE Txirrindularitza Klub apal eta langilearentzat nazioarteko txirrindularitzaren hitzordu garrantzitsuenean lau txirrindulari izatea garaipen erraldoia da”, adierazi du taldeak.
Esperientzia hau ez dute urtero bizitzen: “Urteetako lanaren, ilusioaren eta harrobiaren indarraren fruitua da”. Eneko Olveira, OTXEkoen artean, helmugaratzen lehena izan da, 23 urtez azpiko sailkapen orokorreko zazpigarrena izan baita. Lucia Miralles 34. postuan helmugaratu da, eta handik gutxira Cynthia Martin (37.) heldu da. Roger Turnek, berriz, 52. egin du Val di Soleko helmugan.
“Emaitzetatik harago, lortutakoa ikaragarria da. Oarsoaldeko eta gure eskolako izena munduko gailurrera eramatea lortu duzue”, eskertu die taldeak. Talde apalek laguntza behar izaten dute; alegia, familiena eta babesleena. Eta haientzat ere esker oneko hitzak helarazi ditu klubak: “Eskerrik asko gurekin amesten laguntzen duzuen guztiei”. Lortutakoa barneratuta lanean jarraitzeko ordua heldu zaie, erronka berrien bila aterako dira errepideetara. “Zuek zarete gure harrotasuna eta gazteenen ispilua”.
