Kultura Aniztasunaren Festa egingo du Elizaldek larunbatean
Hilaren 12ko ospakizunerako egun osoko egitaraua antolatu dute; dantza tailerrak edota janari dastaketak izango dira herrian.
Elizalde Eskolak 50. urteurreneko ospakizunekin jarraitzen du ikasturte berri honetan ere, eta hurrengo jardueraren data argitaratu dute: hain justu, hilaren 12an Kultura Aniztasunaren Festa egingo dute Oiartzungo plazan udako azken ekintza gisa. Azaldu dutenez, Elizalderentzat “ezinbestekoa” da mota horretako jai bat antolatzea eta kalera ateratzea, egungo eskola “Oiartzungo aniztasunaren benetako isla” baita.
Era berean, kontatu dute jaialdiaren helburuetako bat dela eskolako haurrek txikitatik ikastea “desberdintasuna ez dela oztopoa, baizik ere gure gizartea aberasten duen altxorra”. Hori horrela, egun osoko egitaraua antolatu dute, eta, besteak beste, tailerrak, janari dastaketa edota zenbait dantza mota ikastaro egingo dituzte. Bestalde, nabarmendu dute Honduras, Pakistan, Euskal Herria, Sahara, Kolonbia, Italia, Irlanda, Uruguai, Argentina eta Palestina bezalako herrialdeetako zapore edota erritmoek bat egingo dutela Doneztebe plazan “aniztasuna eta elkarbizitza aldarrikatuz”.
Larunbatekoa udako azken hitzordua izango da, baina antolatzaileek dagoeneko aurreratu dute udazkenean beste zenbait jarduera egingo dituztela, hala nola: bertso saioa, mural komunitarioa sortzea, gaueko martxa, urteurreneko liburuaren aurkezpena edota dokumentala.
Kultura Aniztasunaren Festa
- 11:00 – 14:00. Tailerrak eta janari dastaketa
- 12:00. Cumbia ikastaroa
- 12:30 – 13.30. Dantza afrikarren tailerra
- 16:30. Ipuin kontaketa eta, ondoren, tailerra
- 17:30. Askaria: krepak eta alfajoreak
- 18:00. Tango eta candombe emanaldia
- 19:00. Erromeria Eromeri taldearekin
