Bazterkeria egoeran dauden pertsonentzako, Eguneko Arreta Zentroa
Lezoko, Oiartzungo eta Pasaiako Udalek jarri dute zerbitzua martxan. Ate irekiak hilaren 16an izango dira, 17:00etatik 19:00etara.
Lezoko, Oiartzungo eta Pasaiako Udalek bazterkeria egoeran edota bazterkeria arriskuan dauden pertsonentzako Eguneko Arreta Zentroa jarriko dute martxan hilabete honetan Gipuzkoako Foru Aldundiaren laguntzarekin. Zerbitzu honekin hiru herri horietan bazterkeria arriskuan edota egoera horretan dauden pertsonen arreta eta gizarteratze prozesuak indartu nahi dituzte “komunitatearen ikuspegitik eta baliabideen arteko koordinazioa sustatuz”.
Aipatutako zerbitzu berri hori Lezoko Kamineroetxe eraikinean dago kokatuta –Jaizkibel Hiribidea, 4–, eta Lezo, Oiartzun eta Pasaiako herritarrei emango die zerbitzua. Orotara 18 lagunentzako lekua izango du: horietatik 15 plaza arruntak izango dira, eta beste hirurak “premiazko egoeretarako” erreserbatuko dituzte.
Hori horrela, azaldu dute zentroaren helburu nagusia pertsonen autonomia eta bizitza kalitatea sustatzea, haien ohiko bizi ingurunean eta komunitatean mantentzen laguntzea eta isolamendu egoerak arintzea dela.
Kudeaketa, gizarte zerbitzuen bidez
Kamineroetxean artatua izateko hiru herrietako udaletako gizarte zerbitzuetara jo behar da, eta behin dagokion balorazio eta preskripzio teknikoa izan ondotik bideratuko dituzte pertsonak hara. Hala ere, eguneko arreta hori jasotzeko gutxienez duela hiru hilabetetatik Lezon, Oiartzunen edota Pasaian bizi izan behar da.
Arreta astelehenetik ostiralera emango dute, 09:000etatik 15:00etara, eta bertan, besteak beste, gosaltzeko eta bazkaltzeko aukera, higiene pertsonalerako baliabideak, arropa garbitzeko aukera edota ondasunak gordetzeko espazioa izango dituzte eskura erabiltzaileek. Era berean, “euste emozionalerako, auto zaintzarako eta euren egoera arintzeko oinarrizko trebetasunak eta gaitasunak eskuratzeko akonpainamendu profesionala” izango dute. Horietaz gain, baina, ordenagailuak, prentsa, literatura, irakurtzeko materiala eta mahai jokoak ere izango dira bertan.
Herritarrek eraikin berria ezagutzeko aukera izango dute hilaren 16an, 17:00etatik 19:00etara. Inaugurazio ofiziala, baina, udazkenean egingo dute.
