Askatasuna eta eskubideen alde kalea hartzera deitu du Orereta/Errenteria Herri Ekimenak
1936-2026 Faxismoaren aurrean, askatasuna. Hori, larunbat arratsaldean Errenteria-Oreretako kaleak zeharkatuko dituen manifestazioaren leloa. Faxistek herria okupatu zuten 90. urteurrena beteko da hilaren 13an.
1936-2026 Faxismoaren aurrean Askatasuna, manifestazioaren aurkezpena.Martin Sansinenea 1936-2026 Faxismoaren aurrean, askatasuna. Hori, larunbat arratsaldean Errenteria-Oreretako kaleak zeharkatuko dituen manifestazioaren leloa. Oinarrian, data bat, udalerria iluntasunean murgildu zuen 1936ko irailaren 13ko faxisten okupazioa; aurten, etzidamu zehazki, 90 urte beteko dira herria indarrez hartu eta errepresioa, beldurra eta isiltasuna ezarri zutela. Hortik aurrerako hamarraldietan ehunka lagun jazarri, espetxeratu, hil edota erbestera kondenatu zituen erregimen frankistak, eta sokakoak ez zituen alderdi politiko, elkarte eta sindikatuak legez kanpo utzi.
Euskaraz hitz egiteko debekua eta euskal kultura eta izaera jazarri zituen frankismoak eta errepresio isilagoa ezarri etxeetan eta kontzientzietan. Trabajadoriak esklabo gisa baliatu zituen erregimen frankistak eta herritik joan behar izan zuten askok, itzultzerakoan, ondasun pertsonalik eta etxebizitzarik gabe utzi zituzten, haien jabetzak konfiskatu zizkietelako.
Hori guztia gogoraraztea, ahaztu ez dadin, gertatutakoaren errelato zuzena transmititzea, eta okupazio faxista eta diktadura frankistaren ondorioak jazo zituztenei aitortza egitea du helburu Orereta/Errenteria Herri Ekimenak mobilizazioarekin: “Oroitzen dugu ez ahazteko, justizia eskatzen dugu erreparatzeko, eta etorkizunari itxaropenez begiratzen diogu”.
Agerraldia egin zuen atzo arratsaldean herri iniziatibak manifestaziora deitzeko, eta haren atzean adin, jatorri eta pentsaera askotariko norbanakoak; guztiak, antifaxistak, izaera horrek batu ditu. Agertokia, Maria Lezo eta Madalen kaleak bat egiten duten puntuan margotutako Gernika muralaren aurreko aldea.
Atzera begira jarri ziren protestaren zioa testuinguratzeko, baita orainari ere. Izan ere kezkaz azaldu zuten “beldurra elikatzen duten diskurtsoak” hazi direla berriro: “feminismoaren aurrerapenak zalantzan jartzen dituzte, askatasun sexuala eta aniztasuna zalantzan jartzen dituzte, publikoa dena mespretxatzen dute, aldaketa klimatikoa bezalako erronkak ere ukatzen dituzte, eta pertsona ahulenak eta zaurgarrienak seinalatzen dituzte”. Hori horrela, larunbatean, hilaren 12an, frankismo, faxismo eta totalitarismo adierazpen oro arbuiatzeko kalera ateratzera deitu dituzte herritarrak, “dataren aukeraketak balio sinboliko sakona du: 1936ko irailaren 13an tropa faxistak Errenteria-Orereta manu militari hartu zuten eguna izan zen. Indarkeria, errepresio eta autoritarismo memoria haren aurrean, jendarte askeago, justuago, berdinago eta solidarioago bat aldarrikatzen dugu”.
Gizarte aske eta demokratikoa
Larunbateko manifestazioak zerbitzu publiko eta duinak, esplotazio eta prekarietaterik gabeko gizartea, gazteentzako aukera gehiago, militarismoen eta Palestinaren genozidioaren bukaera, feminismoa, sexu askatasuna, gizarte laiko, berdinzale eta solidarioa, eta aniztasuna, berdintasuna, klima aldaketaren kontrako borroka edota migratzaileen eskubideak defendatuko dituela azaldu zuten. Hori guztia dagoelako jokoan: “azken batean, balio errepublikanoak eta euskal herritarrok ditugun eskubide guztiak defendatuko ditugu, baita gure etorkizuna aukeratu ahal izatea ere, horiek guztiak gizarte aske eta demokratiko baten defentsaren parte direlako”.
Agirre Lehendakariaren plazatik abiatuko da larunbateko manifestazioa, 19:30ean. Martxak egingo duen ibilbidearen izaera “sinbolikoa” nabarmen jarri dute deitzaileek: “Anbulatorioko biribilgunera joko dugu, osasungintza publiko baten defentsa erdigunean jarriz”. Francis Vicente Vadillo Santamariaren omenezko zebrabidea ere zeharkatuko du askatasunaren aldeko manifestazioak, eta ondoren, Gabierrotaruntz joko du, “fgaxistak bertatik sartu ziren indarren Errenteria-Oreretara 1936ko irailaren 13an; guk alderantzizko bidea egingo dugu, bere errepresio eta faxismo legatuaren aurkako adierazpen gisa”.
Handik Gabierrota pasealekura joko du manifestazioak, Jesusen Bihotza erresidentzia ondora, zaintza publiko duin eta kalitatezkoa aldarrikatzeko, “gerra edo gerraostea pairatu zutenentzako hain zuzen ere”.
Hasitako puntu berean bukatuko dute manifestazioa adierazpena irakurrita.
