Hilaren 19an abiatuko da Euskal Herriko Bertsolari Txapelketa
Hazparnen izango da 2026ko lehen saioa. Alaia Martin Etxebesteren txanda urriaren 31n izango da, Eibarren.
Alaia Martin Etxebeste izango da Oarsoaldeko ordezkari bakarra. Pozik dira bertsolariak, eta baita bertsozaleak ere, atzo bertan iragarri baitzuten hilaren 19an Hazparnen emango zaiola hasiera 2026ko Euskal Herriko Bertsolari Txapelketari. Azpeitiko Sanagustin kultur gunean egin zuten aurkezpen ekitaldia, eta bertan iragarri zuten zein izango diren bertsolariak, zein epaileak, eta baita gai jartzaileak ere.
Orotara 42 bertsolari izango dira kantuan, tartean Alaia Martin Etxebeste oiartzuarra –berak irabazi zuen 2024ko Gipuzkoako Bertsolari Txapelketa–, eta sei pertsonaz osatutako zazpi talde egingo dituzte. Horiek saio bakarrera lehiatuko dira, eta multzo bakoitzeko irabazlea zuzenean pasako da hurrengo fasera.
Finalaurrekoetan, berriz, 24 pertsona lehiatuko dira, eta bertan ariko dira 2022ko zazpi finalistak zein lehenengo fasetik sailkatu diren 17 bertsolariak. Finalaurreko faseak bi itzuli izango ditu.
Finalean, azkenik, zortzi bertsolari lehiatuko dira, eta bertan ariko dira 2022ko txapelduna eta aurtengo finalaurrekoetatik puntuazioz sailkatutako zazpiak.
Alaia Martin, Eibarren
Dagoeneko publiko egin dute noiz eta non izango diren saio guztiak, eta oiartzuarraren txanda urriaren 31n izango da. Eibarren lehiatuko da Martin Nerea Ibarzabal Salegirekin batera, eta saioa osatzeko oholtzan izango dituzte Aguraingo zein Hazparneko irabazleak eta puntuazioz bosgarren eta zortzigarren postuan geratzen diren bertsolariak.
Bertso saioetarako txartelak aldez aurretik erosi behar dira esteka honetan.
Saioak
- Hilak 19, Hazparne.
- Hilak 26, Altsasu.
- Hilak 27, Lekeitio.
- Urriak 3, Donapaleu.
- Urriak 4, Tolosa.
- Urriak 10, Gotaine – Irabarne.
- Urriak 11, Agurain.
- Urriak 24, Larraun – Lekunberri.
- Urriak 31, Eibar.
- Azaroak 7, Gernika – Lumo.
- Azaroak 14, Miarritze.
- Azaroak 21, Donostia.
- Azaroak 28, Gasteiz.
- Abenduak 5, Bilbo.
- Abenduak 20, Iruñea.
