Gaztañok beti izango ditu gogoan
Garagaztaño azokaren lehen ekitaldia egin dute gaur, egun osokoa, Gorka Telletxea eta Jon Telletxea anaiak omentzeko. Dozenaka lagun gerturatu dira goizeko ekitaldi eta bazkarira. Arratsaldean musika izango da protagonista.
Garagaztaño, gaur Gaztaño auzoko frontoian Telletxeatarrak oroitzeko. Auzoaren parte dira eta haien izenak eta izanak, auzoarekin batera jarraituko dute bidea egiten. 2025eko irailean hil zen Gorka Telletxea, eta aurtengo martxoan, berriz, haren anaia, Jon Telletxea. Haien omenez, festa ederra antolatu dute Gaztañoko jai batzordeak, auzo elkarteak eta hainbat norbanakoak: Garagaztaño.
Oinarrian bi anaiak omentzeko ekitaldia, eta haren bueltan, artisau garagardoa. Gorkak beti esaten omen zuen auzoan artisau garagardo azoka antolatu behar zutela. Jon, anaiak, berriz, Maritxu Mozkor jai txikiak egin behar zituztela. Bien amets edo erronkak hartuta sortu zen Garagaztaño, auzoan zein auzotik ezagunak ziren bi anaiak omentzeko.
Eguerdian hasi da azoka, Gaztañoko frontoian. Ekitaldi xumea egin dute, eta Gorka Telletxearen lankideek egindako eskultura, frontoi sarreran jarri dute; haren izena daraman bizikleta. Ekitaldiaren ostean eta artisau garagardo postuak zabalik, mahairen bueltan bildu dira 250 lagun. Versum (Irun), Zanpano (Aizarnazabal), Brewery Land (Zumaia), Bidassoa (Bidasoaldea-Nafarroa), Kaneta (Hendaia), eta Otsaihen (Hernani) garagardoak dastatzeko aukera izango da egun osoan zehar. Frontoia lepo eta eguraldia lagun, arratsaldean musikak hartuko du lekukoa gauerdira arte. Benetan musika taldeak (16:30) eta Peppermint Sextetek joko dute(19:00). Zozketa eta bideoaren txanda helduko da ostean, eta zozketaren irabazleak artisau garagardo sorta jasoko du. 22:30ean Ximaur Punk Oreretako taldeak hartuko du lekukoa. Afaltzeko hanburgesak eta otartekoak izango dira. Egun pasa Gaztañon egiteko aitzakiarik ez da behar, beraz. Gainera, sorpresak ere izango direla aurreratu dute, datu gehiagorik eman gabe, antolatzaileek.
Telletxeatarrek auzoan eta auzotarrengan arrastoa utzi zuten zalantzarik ez da; Gaztañok, arrasto hori betikotu egin du gaur.
