Memoria, errepikatuko ez denaren berme
Tropa faxistak Errenteria-Oreretara sartu zirela 90 urte bete bezperan ekitaldi instituzionala egin du udalak gaur. Herriko Plazak hartu du ekitaldia eta bat egin dute herritarrek deialdiarekin.
Okupazio faxistaren 90. urteurrenaren harira, ekitaldi instituzionala. Tropa faxistak Errenteria-Oreretara sartu zirela 90 urte bete bezperan ekitaldi instituzionala egin du udalak gaur. Herriko Plazak hartu du ekitaldia eta bat egin dute herritarrek deialdiarekin. Udalean ordezkaritza duten alderdi ia guztietako ordezkariek hartu dute parte gaurko ekitaldian; PP alderdiaren ordezkariak ez du bat egin.
Txalaparta doinuek hautsi dute plazan zen isiltasuna, eta ondotik Aizpea Otaegi alkateak hartu du hitza. Bernar Lemos (EH Bildu), Maite Gartzia (Elkarrekin Errenteria), Isaac Palencia (PSE-EE) eta Elixabete Murua (EAJ) zinegotziek lagunduta. Gertaera hark ordena demokratikoa apurtzea, demokratikoki eraikitako herri erakundeak ordezkatzea, eta herritarren eskubide zibil eta politikoak deuseztatzea ekarri zuela adierazi du udal agintariak, “asko eta askotarikoak izan ziren herritarrek pairatu behar izan zituzten eskubide urraketak, eta urraketa horiek urte luzez gertatu ziren gainera”.
Gaurko ekitaldiarekin gertatu zena oroitu nahi dutela gaineratu du Otaegik, “gure historiaren etapa ilun horretan hainbeste galdu eta sufritu zutenen saminarekin bat egin nahi dugulako. Askatasuna defendatu zuten pertsona guztien ekarpena oroitu eta aitortu nahi dugulako, eta gure konpromisoa berretsi nahi dugulako, gaur ere defendatu behar diren demokraziarekin eta giza eskubideekin”.
Ordezkari politikoek udalak egindako adierazpen instituzionala irakurri dute, zatika, euskaraz lehenik, eta gaztelaniaz ondoren. Osoa irakurtzeko egin klik hemen. Sentsibilitate ezberdinetatik, konpromiso komun bat erakutsi nahi izan dutela adierazpen horren bitartez azaldu du alkateak, “gertatutakoa gogoratzea, biktimak aitortzea, eta demokrazia eta giza eskubideak defendatzea”.
Jose Elorza Narbaiza, Felix Elgarrista Arbelaitz, Celestino Gaztelumendi Berasategi, Miguel Irastorza Etxeberria udal langileei, eta Serapio Mendarte Ugarte zinegotziari aipamen berezia gaurko ekitaldi horretan; horien gorpuak oraindik ere ez baitituzte berreskuratu euren familiek, 90 urte geroago. 2016an omenaldia eskaini zien horiei Errenteriako Udalak eta plaka bat jarri haien izenekin udaletxe sarreran. Bereziki euren senideen gorpuak berreskuratu ez dituzten familien minarekin eta euren herria eta familia utzi behar izan zituzten gerrako umeek bizi izandako deserriarekin bat eginez lore eskaintza egin dute ordezkari politikoek zein gerturatutako herritarrek. Puntu horretan Berri txarrak taldeak Maravillas Lanbertori eskainitako kantuaren hitzak bere egin ditu Otaegik, “norbaitek oroituko ditu etorkizunean ahanzturaren zingira honetan ito dituztenak, abesti berriren batean, zuhaitz zaharren azaletan, ibaien zilar uretan, iluntzeetan. Eta oroitu ditzagun gaur egiten ari garen bezala, gure erakunde eta herri eta hirietako plazetan”. Minutuko isilunea eginda, txalapartariek Martxa baten lehen notak doinua jo dute, bildutakoen txaloen artean.
