Lurtarren artean lehena
Lehen jardunaldian hirugarren izan ondoren, hegan egin zuen atzo 'Batelerak' ontziak, eta bigarren izan dira Kontxako sailkapenean.
'Batelerak' ontzia.Joseba Parron San Sebastian / Irutxuloko Hitza San Juango emakumeek osatu duten denboraldi bikaina biribildu zuten atzo Kontxako Banderaren bigarren jardunaldian. Lehen igandean estropada bikaina egin eta hirugarren izan ondoren, atzo hegan egin zuen Batelerak ontziak, eta bigarren izan dira sailkapen nagusian, garaile izan den Arraun Lagunak-etik 20 segundora. Beste hitz batzuetan esanda: lurtarren artean ontzi onena izan da San Juangoa. Arraun Lagunak-ek, talde estralurtarra dela esatea agian gehiegitxo bada ere, beste traineruekiko oso urrun dela azaldu baitu.
Bigarren igandera begira, sanjuandarren helburuak estropadaz disfrutatzea, hobetzea eta esperientzia hartzea zirela adierazi zuen Anartz Gereño prestatzaileak. Iaz Euskotren Ligara igo ondoren, arrosen asmoak maila mantentzea eta Kontxara sailkatzea ziren. Helburu horiek, baina, erraz gainditu dituzte, eta ligan hirugarren izan eta ohorezko txandan egonkortu ondoren, bigarren izan dira Donostiako badian. Sasoia apartekoa izan da.
Arraun Lagunak-ek estropada kontrolatua izan zuen hasiera-hasieratik. Ziabogara aurretik iritsi zen Lugañene ontzia, baina hortik aurrera denbora jaten hasi ziren Batelerak. Sanjuandarrek bizpahiru segundotara murriztu zuten donostiarrekiko aldea. Sorpresa handia egon zitekeen helmugan; baina azken txanpa ikaragarria egin ondoren, Arraun Lagunak-ek bere bosgarren Kontxa irabazi zuen etxean, laugarrena jarraian.
Sanjuandarrek harro egoteko estropada egin zuten, baita denboraldia ere. Orain atseden hartuko dute, datorren sasoira arte.
