AEKn euskara ikasteko diru laguntza berriak emango ditu udalak
Euskara ikastea "erosoa" izateko, matrikularen hasierako ordainketaren %50eko diru laguntzak emango ditu, eta klaseen gehiengora joaten diren ikasleek eta gurasoek zein aiton-amonek ere laguntzak izango dituzte. Datozen urteetan herrian 196 euskaldun berri izatea da helburua, uneotako euskararen larrialdi linguistikoari aurre egiteko.
Euskara eroso ikasi eta bizi lelopean abiatu du Lezoko Oroitzene AEK-k 2026-2027 ikasturterako matrikulazio kanpaina. Ahalik eta lezoar gehien euskalduntzeko helburuarekin, Lezoko Udalak eta AEK-k hainbat diru laguntza emango ditu, gaur goizean, irailaren 16an, egindako prentsaurrekoan jakinarazi dutenez. Iker Salaberria Lezoko Udaleko Euskara Zinegotzia eta Aitor Galdos eta Idoia Arbelaitz Oroitzene AEK-ko irakasleak izan dira bertan.
Azaldu dutenez, euskara ikastea herritar guztientzat eskuragarria izatea nahi dute, eta horretarako, bi proposamen aurkeztu dituzte. Alde batetik, Eusko Jaurlaritzaren Euskara Bonua berritu du Lezoko Udalak. Bonuarekin, 120 euroren truke, A1 eta A2 mailako ikasleek lau urteko epean B1 mailara iristeko aukera dute. Eta beste aldetik, euskararako sarbidea eskuragarria izateko asmoz, udalak diru laguntzak indartu ditu.
Ildo horretatik, beste urte batez, ikasturte amaieran klaseen %75era joan direla bermatzen duten ikasleei matrikularen kostu osoa itzuliko zaie. Era berean, 12 urte azpiko umeen gurasoek zein aitona-amonek matrikularen %30 soilik ordaindu beharko dute. Horrez gain, eta berritasun gisa, matrikularen hasierako ordainketaren %50eko diru laguntza jasotzeko aukera dute aurten ikasleek. “Euskara ikastea eskuragarria eta irisgarria izan dadin nahi dugu eta horregatik jarri ditugu martxan neurriak”, esan du Salaberriak.
196 euskaldun gehiago helburu
Prentsaurrekoan azpimarratu dute, Euskalgintzaren Kontseiluak ohartarazi bezala, euskara larrialdi linguistikoan dagoela. “Egindako ikerketen arabera, 2036ra arnasguneak erabat desagertuta eta gureak bezalako herri euskaldunak erdaldunduta iritsiko gara”, ohartarazi du Salaberriak. Euskalgintzaren Kontseiluak datozen hamar urteetarako jarritako erronkaren arabera, 2036rako 300.000 euskaldun berri sortu beharko lirateke larrialdia gainditzeko; Lezora ekarrita, 196 euskaldun gehiago izatea dute helburu udalak eta AEK-k. “Guztiontzat onuragarria da herritarrak euskalduntzea; oinarrizko eskubidea delako euskara ikastea eta lan esparruan zein herrian harreman berriak eraikitzeko tresna delako”, esan du zinegotziak.
Gauzak horrela, AEK-ko irakasle Galdosek eta Arbelaitzek herritarrak gonbidatu dituzte euskaltegian matrikulatzera. “Urteak daramatzagu Euskal Herria euskalduntzen, baina oraindik lan handia dugu aurretik. 2036rako Lezoren erronka 196 pertsona euskalduntzea bada ere, izan daitezela 200 edo 300, ahalik eta gehien”, animatu ditu herritarrak Galdosek.
