Hamar herrialdek egin dute topo Doneztebe plazan
50. urteurreneko egitarauaren barruan kokatutako kultura aniztasunaren festa ospatu du Elizaldek. Musika eta jatekoa izan dira nagusi.
“Eguraldi eta giro apartak lagunduta”, kultura aniztasunaren festa ospatu du Elizaldek. 50. urteurreneko egitarauaren barruan antolatutako beste jarduera bat izan da hori, eta munduko zapore, musika eta kultura jarri dituzte erdigunean.
Munduko hamar herrialdetako tradizioek egin zuten ba Oiartzunen; hala nola, Honduras, Pakistan, Euskal Herria, Sahara, Kolonbia, Italia, Irlanda, Uruguai, Argentina eta Frantzia. Herrialde bakoitzeko bizilagunek beren elikagaiak eraman zituen plazara, eta, hartara, bertaratu ziren herritarrek mota askotako jakiak dastatzeko aukera izan zuten.
Hasieran aipatu moduan, musika bera ere ospakizuneko zati garrantzitsu bat izan zen, eta eguna alaitzeko Kolonbiako cumbia, Afrikako dantzak, Argentina eta Uruguaiko tango zein candombe fusioak edota Euskal Herriko trikitia eta erromeriak jarri zuten plaza dantzan.
Erakusketak eta ipuinak ere bai
Erakusketak ere izan ziren Doneztebe plazan: Italiako pasta moten jatorri geografikoa, Irlandako zelta kultura, Argentina eta Uruguaiko ipuin eta liburuak edota Euskal Herriko musika zein baserriko tresnak, kasu.
Antolatzaileek egunaren errepasoa egin dute, eta gaineratu Karmele Mitxelena idazleak Sahararren jaima barruan ipuin kontaketa bat egin zuela. Orotara hiru istorio kontatu zituen: Guatemalako tradiziotik edaten duen Kezkamuxelak, Afrikako neska baten historia jasotzen duen Nandiren sorpresa, eta etnia ezberdinetako pertsonaiak batzen dituen I love you because I love you.
Elizaldetik eskerrak eman dizkie jarduera horietan parte hartu zuten herritar guztiei, eta gogorarazi urriaren 10ean bertso bazkaria eta urriaren 24an gaueko martxa egingo dituztela.
