Ikasketa gela berria astelehenetik aurrera, Zamatetan
Hilaren 30ean Manuel Lekuona bibliotekako ikasketa gela itxiko dute, eta hortik aurrera Zamatetakoa erabili beharko dute herritarrek.
Ikasketa gela berria izango du Oiartzunek astelehenetik (hilak 21) aurrera: Zamateta ikasketa gela. Kontzejuerreka kalean dago, Esteban Muruetagoiena osasun zentroaren parean eta Zamateta etxearen etxabean.
Astelehenetik igandera egongo da zabalik, 07:00etatik 22:00etara, eta 70 metro koadro ditu. Oraingoz 27 ikasketa plaza ditu, baina gehiagorentzat ere badu lekua momentu jakinetarako.
Erabiltzaileek argi naturala, komuna eta wifia izango dituzte, besteak beste, eskura, eta ingurua berritu dutela jakinarazi du udalak. Hala ere, nabarmendu dute erabiltzen hasi ahala sortzen diren beharren eta doitzeen jarraipena egingo dutela, eta erabiltzaileen ekarpenak ere entzungo dituztela.
Urte erdi baino gutxiagoko iraupena izan dute ikasketa gela berria atontzeko lanek, eta 215.500 euroko inbertsioa egin dute horretarako.
Hilaren 30ean Manuel Lekuona bibliotekako ikasketa gela itxi egingo dute, eta hortik aurrera Zamatetakoa erabili beharko dute erabiltzaileek. Era berean, azaldu dute zenbait eragilerekin eta herritarrekin elkarlanean hausnarketa eta parte hartze prozesu bat eginda, Manuel Lekuona udal biblioteka eraldatzeko proiektua duela Oiartzungo Udalak.
